BAKI, AzerVoice

Qəzzada səhiyyə sistemi iflic olmaq üzrədir.

AzerVoice xəbər verir ki, BMT-nin Fələstinli Qaçqınlara Yardım Agentliyi (UNRWA) Qəzza zolağında səhiyyə sisteminin tamamilə çökmə təhlükəsi ilə üz-üzə olduğunu açıqlayıb.

Agentlik həyati əhəmiyyətli dərmanların və qan preparatlarının tükəndiyini, tibbi ləvazimatların isə 45 faizinin artıq qalmadığını bildirib.

UNRWA-nın X sosial media platformasında yaydığı açıqlamaya görə, mövcud tibbi ehtiyatların cəmi 6 həftəlik müddətə kifayət etməsi proqnozlaşdırılır. “Qəzzada səhiyyə ehtiyacları getdikcə artır və bu vəziyyət gündəlik həyatı daha da kritik hala gətirir”, – deyə bildirilir.

Qeyd edək ki, 7 oktyabr 2023-cü ildən bəri İsrailin intensiv hərbi əməliyyatları nəticəsində bölgədə bir çox xəstəxana və səhiyyə müəssisəsi fəaliyyətini dayandırıb. Qəzza Səhiyyə Nazirliyinə əsasən, hazırda yalnız 5 dövlət və 11 özəl xəstəxana qismən işləyir, 8 sahə xəstəxanası isə təcili tibbi xidmət göstərməyə çalışır.

Son məlumatlara görə, Qəzzada hücumlar nəticəsində əksəriyyəti qadın və uşaqlardan ibarət olmaqla 185 minə yaxın fələstinli ölüb və ya yaralanıb, 11 mindən çox insan isə hələ də itkin düşmüş hesab olunur.