BAKI, AzerVoice

İran bəyan edib ki, İsrailin hücumları ABŞ-ın koordinasiyası və icazəsi olmadan həyata keçirilə bilməzdi və bu səbəbdən hücumun təhlükəli təsir və nəticələrinə görə məsuliyyət ABŞ üzərinə düşür.

AzerVoice xəbər verir ki, İran Xarici İşlər Nazirliyinin yazılı açıqlamasında, İsrailin İranı hədəf alan hücumlarından ABŞ da məsul tutulub.

Açıqlamada qeyd olunub ki, İsrail İranın torpaq bütövlüyünü və milli suverenliyini pozaraq, Tehran şəhərindəki bir neçə yaşayış məntəqəsi və ölkənin bir neçə şəhəri daxil olmaqla bəzi ərazilərə hücum edib.

Birləşmiş Millətlər Təşkilatının (BMT) müvafiq maddələrinə əsasən, İranın bu hücuma cavab vermək haqqının olduğu vurğulanaraq, "İran İslam Respublikasının hərbi qüvvələri, İran xalqını bütün gücü ilə və öz müəyyən etdiyi şəkildə müdafiə etməkdən çəkinməyəcək" ifadələrinə yer verilib.

İsrailin hücumlarından dəstəkçilərinin də məsul olduğu vurğulanan açıqlamada belə deyilib:

"Sionist rejimin İranə qarşı təcavüzkar əməliyyatları ABŞ-ın koordinasiyası və icazəsi olmadan həyata keçirilə bilməz. Buna görə də, bu rejimin başlıca dəstəkləyicisi olan ABŞ hökuməti Sionist rejimin macəralarının təhlükəli təsirləri və nəticələrindən məsul olacaq."

İran Xarici İşlər Nazirliyi həmçinin, BMT Baş Katibindən BMT Nizamnaməsinə uyğun olaraq bu məsələdə dərhal tədbir görməsini tələb edərək, BMT-nin bütün üzv dövlətlərini, xüsusilə regional və İslam ölkələrini, Hərəkatsızlar Hərəkatının üzvlərini və beynəlxalq sülh və təhlükəsizliklə maraqlanan bütün dövlətləri bu təcavüzkarlığı dərhal pisləməyə çağırıb.

Qeyd edək ki, 13 iyunda İsrailin İrana hərbi hava hücumu nəticəsində çoxlu sayda hərbçi, o cümlədən SEPAH baş komandanı Hüseyn Salami ölüb.