BAKI, AzerVoice

İran son bir neçə saat ərzində İsrailə qarşı 100-dən çox pilotsuz uçan aparatı yönləndirib.

AzerVoice xəbər verir ki,İsrail ordusunun sözçüsü Aviçay Adraee X hesabında verdiyi açıqlamada PUA -ların son bir neçə saat ərzində İsrailə doğru hərəkət etməyə başladığını bildirib.

Adraee, İranın atdığı PUA-ları İsrailə çatmamış zərərsizləşdirmək üçün hərəkətə keçdiklərini qeyd edib.

İran İnqilab Keşikçiləri Korpusuna yaxınlığı ilə tanınan Sepahnews, İrandan İsrailə kamikadze PUA-ların göndərildiyini açıqlayıb.

İsrail ordusunun X hesabından edilən paylaşımda İranın Baş Qərargah rəisi Məhəmməd Baqeri və İnqilab Keşikçiləri Qvardiyasının komandanı Hüseyn Səlaminin öldürüldüyü təsdiqlənib və İranın hər yerində həyata keçirilən hücumlarda 200-dən çox döyüş təyyarəsinin istifadə edildiyi bildirilib.

İsrail mediası təhlükəsizlik mənbələrinin İranın bir neçə saat ərzində qisas alacağını proqnozlaşdırdığını bildirib. İranın İsrailə raket hücumu edəcəyi gözlənilirdi.

Qeyd edək ki, 13 iyunda İsrailin İrana hərbi hava hücumu nəticəsində çoxlu sayda hərbçi, o cümlədən SEPAH baş komandanı Hüseyn Salami ölüb.