^{Foto: Reuters}

BAKI, AzerVoice

İsrail, Beynəlxalq Atom Enerjisi Agentliyinin (BAEA) İranda uranın zənginləşdirilməsi prosesinin sürətləndiyini göstərən məlumatlarından narahatlığını bildirib.

AzerVoice-un məlumatına görə, İsrail tərəfinin fikrincə, bu, Tehranın nüvə proqramının dinc məqsədli olmadığını göstərir.

Daha əvvəl AFP agentliyi, BAEA-nın məxfi hesabatına istinadən, son aylarda İranın yüksək dərəcədə zənginləşdirilmiş uranın istehsalını nəzərəçarpacaq dərəcədə sürətləndirdiyini açıqlayıb.

İsrail Baş naziri Binyamin Netanyahunun ofisi bu hesabatı “narahatedici və birmənalı” adlandırıb.

“Hesabat qaranlıq mənzərə yaradır və açıq xəbərdarlıq edir: beynəlxalq ictimaiyyətin dəfələrlə etdiyi xəbərdarlıqlara baxmayaraq, İran hələ də məqsədyönlü şəkildə nüvə silahı əldə etməyə doğru gedir.

Hesabat İsrailin illərdir təkrarladığı mövqeyini inandırıcı şəkildə təsdiqləyir: İranın nüvə proqramının məqsədi heç də dinc deyil. Bu, İranın uranın zənginləşdirilməsi üzrə işlərinin miqyası və səviyyəsindən açıq şəkildə görünür. Belə zənginləşdirmə səviyyəsi yalnız nüvə silahı əldə etməyə çalışan ölkələr üçün xarakterikdir və bunun mülki və ya enerji istehsalı ilə heç bir əlaqəsi yoxdur. Bundan əlavə, hesabat göstərir ki, İran Atom Silahlarının Yayılmaması Müqaviləsi çərçivəsindəki əsas öhdəliklərini kobud şəkildə pozmağa davam edir və BAEA müfəttişləri ilə əməkdaşlıqdan imtina edir. Beynəlxalq ictimaiyyət dərhal hərəkətə keçməli və İranı dayandırmalıdır” — deyə, baş nazirin ofisindən bildirilib.