BAKI, AzerVoice
Avropa İttifaqı (Aİ) hazırda Rusiya ilə bağlı yeni sanksiyaları, o cümlədən enerji sahəsində neftə qiymət tavanının azaldılması imkanını müzakirə edir.
AzerVoice-un məlumatına görə, bu barədə Almaniyanın xarici işlər naziri Yohann Vadeful bildirib.
"Hal-hazırda biz Avropa İttifaqında tərəfdaşlarımızla birlikdə Rusiyaya qarşı əlavə sanksiyaları müzakirə edirik. Bu zaman enerji sektoruna xüsusi diqqət yetiririk və Rusiya neftinə tətbiq olunan qiymət tavanının azaldılması imkanını da nəzərdən keçirəcəyik. Məqsədimiz tamamilə aydındır, biz Rusiyanın hərbi büdcəsini artırmaq istəmirik" - deyə, Vadeful bildirib.
Xatırladaq ki, Avropa Komissiyasının (AK) rəhbəri Ursula fon der Lyayen Aİ-nin Rusiyaya qarşı 18-ci sanksiya paketini hazırladığını və bu paketə neftə dair tədbirlər, qiymət tavanının azaldılması, “kölgə donanması”na qarşı yeni məhdudiyyətlərin daxil olacağını bildirmişdi.
Həmçinin onu qeyd edək ki, Aİ ölkələri bu həftə Rusiyaya qarşı 17-ci sanksiya paketini təsdiqləyiblər. Bu paket çərçivəsində 17 nəfər və 58 təşkilat, həmçinin Rusiyadan neft və neft məhsulları daşıyan və qiymət tavanı məhdudiyyətlərini nəzərə almayan 189 tanker qara siyahıya salınıb.