Bakı, AzerVoice

Çin dünən həyata keçirdiyi qitələrarası ballistik raket sınağının adi bir fəaliyyət olduğunu və beynəlxalq təcrübəyə uyğun olaraq qanuni şəkildə həyata keçirildiyini bildirib.

AzerVoice xəbər verir ki, Çin Müdafiə Nazirliyinin sözçüsü Zhang Xiaogan Pekində keçirilən mətbuat konfransında sınağın silah qabiliyyətini, eləcə də müvafiq hərbi hissələrin hazırlıq səviyyəsini yoxlamaq məqsədi daşıdığını bildirib.

Canq, Çinin nüvə siyasətinin, müdafiə olunmaq məqsədi daşıdığını bildirib. Həmçinin qeyd edib ki, Çin bu silahdan ilk istifadə edən tərəf olmaq istəmir.

Xatırladaq ki, Çin Xalq Azadlıq Ordusu tərəfindən dünən sınaq məqsədilə Sakit Okeana qitələrarası ballistik raket (ICBM) atıldığı və saxta döyüş başlığı daşıyan raketin dənizdə təyin olunmuş əraziyə düşdüyü bildirilmişdi.

Açıqlamada sınaq buraxılışının Çin ordusunun illik təlim planında rutin bir fəaliyyət olduğu heç bir ölkəni hədəf almadığı bildirilib.

Verilən açıqlamada raketin düşdüyü ərazi haqqında məlumat verilməsə də, buraxılışdan əvvəl müvafiq ölkələrə lazımi xəbərdarlıqların edildiyi deyilib.

Çinin Şimal-Şərqi Asiya qonşusu Yaponiya raket sınağı və Pekinin artan hərbi fəaliyyəti ilə bağlı "ciddi narahatlığını" ifadə edib..

Yaponiya Nazirlər Kabinetinin Baş Katibi Hayaşi Yoşimasa, Çin tərəfinin sınaqla bağlı heç bir məlumat vermədiyini deyib.

Həmçinin Yoşimasa deyib ki, raket Yaponiya üzərindən keçməyib.

Qeyd edək ki, mənzili 5500 kilometri ötən ballistik raketlər "qitələrarası" kimi müəyyən edilir. Çinin bu günə qədər istehsal etdiyi ən qabaqcıl qitələrarası ballistik raket olan "Dongfing (Şərq Küləyi) 41" (DF-41) 12 min ilə 15 min kilometr məsafə qət edə bilir.

Çin qitələrarası ballistik raketi ilk dəfə 1980-ci ildə Cənubi Sakit okeana atdığını bildirib.