Bakı, AzerVoice
Bir gün öncə İsrailin Durzilər yaşayan Məcdel Şəms bölgəsinə edilən raket hücumunun İsrailin Dəmir Qübbəsindən atıldığı iddia edilir.
AzerVoice xəbər verir ki, bu haqda yerli əhaliyə istinadən Türkiyə və Qətər mediası məlumat yayıb.
Məlumata görə, Məcdel Şəmsədəki stadiona raket düşdükdən çox qısa müddət öncə hava hücumu xəbərdarlıq siqnalının eşidilməsi bunun İsrail ordusunun hava hücumundan müdafiə sistemi olan Dəmir günbəzdən atıldığı ilə bağlı iddialar yaradır.
Adının çəkilməsini istəməyən bir sakin Türkiyənin Anadolu Agentliyinə bildirib ki, partlayış hücum xəbərdalıq siqnalının səsindən dərhal sonra baş verib və raketin “Dəmir günbəz” batareyalarının yerləşdiyi Cebel Şeyx bölgəsindən gəldiyi görülüb.
Eyni şəkildə Dohada yerləşən əl-Ərəbi televiziyasının müxbiri bildirib ki, yerli xalq raketin gəldiyi istiqamət və hücum xəbərdalıq siqnalının gecikməsinə görə Dəmir günbəzdən atıldığını düşünür.
Qeyd edək ki, 27 iyul axşam saatlarında İsrailin işğalı altında olan Colan Təpələrindəki Majdel Şəms qəsəbəsində bir futbol meydançasına raketin düşməsi nəticəsində aralarında uşaqların da olduğu 12 nəfərin öldüyü, 17-si ağır olmaqla 35 nəfərin yaralandığı bildirilmişdi.
İsrail ordusu "əllərində olan kəşfiyyat məlumatları və onların öz dəyərləndirmələri nəticəsində" raketin Livanın cənubundakı Şeba şəhərinin şimalından atıldığını bəyan edərək, Livan Hizbullahının məsuliyyət daşıdığını açıqlamışdır.
Livan Hizbullahı isə Məcdel Şəmsdəki hücumun onlar tərəfindən həyata keçirildiyinə dair iddiaları təkzib edərək, "hadisə ilə heç bir əlaqələrinin olmadığını" bildirib.
İsrailin baş naziri Binyamin Netanyahu da hücumla bağlı açıqlamasında "İsrail bu ölümcül hücumu bir kənara qoymayacaq. Hizbullah indiyə qədər heç vaxt ödəmədiyi ağır bədəli ödəyəcək" ifadəsini işlətmişdi.
Onu da əlavə edək ki, 1967-ci ildə İsrailin işğal etdiyi qəsəbə və şəhərlərdən biri olan Məcdel Şəmsdə əsasən suriyalı ərəb druzlardan və az sayda da israilli gəlmələrdən ibarət əhali yaşayır.
Yerli əhalinin əhəmiyyətli dərəcədə təmsil olunduğu qəsəbə və oxşar demoqrafik strukturlar 8 oktyabr 2023-cü ildən Hizbullahın əməliyyatlarının hədəfi olmayıb.
Hizbullah İsrail ordusunun Ərəb əl-Aramşe kimi şəhərlərdəki mövqelərinə tank əleyhinə idarə olunan raketlər və pilotsuz uçuş aparatları kimi yüksək dəqiqlikli silahlardan atəş açsa da, bu şəhərlərdə heç vaxt idarə olunmayan raketlərdən istifadə etməyib.
Xüsusilə Məcdəl Şəms Livan-Fələstin sərhədi yaxınlığında təxminən 300 gün davam edən gərgin döyüşlər zamanı heç vaxt Hizbullahın hücumuna məruz qalmadı.
Qeyd edək ki, 2006-cı ildə Livan müharibəsi zamanı Hizbullah tərəfindən atılan raket işğal altındakı Nazaretdə bir evə düşmüşdü. Hücum 2006-cı il iyulun 19-da baş verib və Hizbullahın baş katibi Seyid Həsən Nəsrullah müharibə hələ də davam edərkən həmin ailədən üzr istəmişdi.
