Bakı, VOA:

Ötən il Türkiyədə ölənlərin sayı əvvəlki ilə görə 4,1 % artaraq 525 min 814-ə çatıb. Qan dövranı sistemi xəstəlikləri ölüm səbəbləri arasında 33,4 faizlə birinci yerdədir.

VOA xəbər verir ki, bu haqda Türkiyə Statistika Qurumu (TÜİK) 2023-cü il üçün ölüm və onun səbəbləri ilə bağlı statistik göstəriciləri açıqlayıb.

Qurumun məlumatlarına görə 2022-ci ildə Türkiyə üzrə ölənlərin sayı 505 min 269 olduğu halda, 2023-cü ildə 4,1% artaraq 525 min 814-ə çatıb. 2023-cü ildə ölənlərin 53,9 faizini kişilər, 46,1 faizini isə qadınlar təşkil edib. 2022-ci ildə hər min nəfərə 5,9 ölüm olduğu halda, 2023-cü ildə hər min nəfərə 6,2 ölüm qeyə alınıb.

Ölüm nisbətinin (hər min nəfərə görə) ən yüksək olduğu şəhər 2023-cü ildə 0,018 ilə Adıyaman, ən aşağı olduğu yer isə 0,002 ilə Şırnak olub.

Ölümlər səbəblərinə görə araşdırıldığında 2023-cü ildə qan dövranı sistemi xəstəlikləri 33,4 faizlə birinci yerdədir. Bundan sonra isə 15,0 faizlə xoşxassəli və bədxassəli şişlər, 13,2 faizlə tənəffüs sistemi xəstəlikləri gəlir.

Qan dövranı sistemi xəstəliklərindən qaynaqlanan ölümlər vilayətlər üzrə araşdırıldığında, 2023-cü ildə bu xəstəliklərdən ölüm nisbətinin ən yüksək olduğu şəhər 50,2% -lə Çanaqqala olduğu görülür.

Xoşxassəli və bədxassəli şişlərdən yaranan ölümlər alt səbəblərə görə araşdırıldığında ölümlərin 29,2 faizi qırtlaq və nəfəs borusu/bronx/ağciyərin bədxassəli şişləri, 7,7 faizi yoğun bağırsağın bədxassəli şişləri və limfoid və hematopoetik bədxassəli şişlər olduğu təsbit edilib.