BAKI,AzerVoice
Britaniya şahzadəsi Harri, ABŞ prezidenti Donald Tramp və milyarder İlon Maskı dolayı yolla tənqid edərək, siyasət və texnologiya sahələrində "liderlikdəki xəstəlik" anlayışını gündəmə gətirib.AzerVoice xəbər verir ki, Los-Ancelesdə keçirilən "Upfront Sammiti"ndə gözlənilmədən çıxış edən Harri, "əsas əxlaq prinsipləri və mərhəmətin hakimiyyət və nəzarət naminə qurban verildiyini" bildirib.
Britaniyanın "The Telegraph" qəzetinin verdiyi məlumata görə, onun çıxışı Böyük Britaniyanın Baş naziri Kir Starmerin Ağ Evdə Donald Tramp ilə görüşündən və kral III Çarlzın ona əl yazısı ilə dəvət göndərməsindən bir neçə saat sonra baş tutub.
Harri nitqində bunları vurğulayıb:
"Hazırda siyasətdən texnologiyaya qədər bir çox sahədə liderlikdəki problemlərin milyonlarla, hətta milyardlarla insan üçün dağıdıcı təsirlər yaratdığı bir dövrdə yaşayırıq. İnsanlara xidmət etmək şəxsi maraqlara qurban verildikdə... Əsas əxlaq prinsipləri və mərhəmət hakimiyyət və nəzarət naminə tərk edildikdə... Amma mən indi bütün bunlardan danışmayacağam."
Harri və Meqan sosial media təhlükələrinə qarşı kampaniya aparır
Şahzadə Harri və həyat yoldaşı Meqan Markl uzun müddətdir ki, sosial medianın təhlükələri haqqında maarifləndirmə kampaniyası aparırlar. Onlar texnologiya nəhənglərini tənqid edərək, uşaqların sosial mediada “məcburi olaraq” süni məzmunlarla qidalandığını və bu platformaların dəyişməyə qarşı dirəniş göstərdiyini bildiriblər.
Harri əvvəllər sosial media istifadəçilərinin " təcrübələrin obyektinə çevrildiyini" də qeyd etmişdi.
Harri İlon Maskı dolayısı ilə tənqid edib
Ötən ilin avqust ayında Kolumbiyaya səfəri zamanı Harri, sosial şəbəkələrdə yayılan saxta məlumatların cəmiyyətə təsirindən danışarkən İlon Maskı dolayısı ilə tənqid edib. O, Maskın sahibi olduğu "X" (keçmiş Twitter) platformasında yanlış məlumatların yayılmasına icazə verildiyini vurğulayıb.
O, bildirib ki, Böyük Britaniyanın Soutport şəhərində baş verən iğtişaşlardan sonra yayılan yanlış xəbərlər insanları çaşdırıb və vəziyyəti daha da pisləşdirib.
"İnternetdə yayılan yalan məlumatlar qısa müddətdə küçələrə sirayət edir. İnsanlar doğru olmayan məlumatlar əsasında hərəkət edirlər. Hər birimizin reallıqla yalanı ayırd etmə məsuliyyəti var. İdeal bir dünyada nüfuzlu şəxslər daha çox məsuliyyət daşımalıdırlar." – deyə Harri bildirib.
Tramp Britaniya kralının dəvətini qəbul edib, lakin Harri ilə münasibətləri soyuq qalır
Cümə axşamı günü Donald Tramp, kral III Çarlzın dəvətini qəbul edərək əvvəlcə Şotlandiyaya, daha sonra isə Böyük Britaniyaya rəsmi səfər etməyə razılaşıb.
Tramp kral Çarlzı və şahzadə Uilyamı tərifləyərək, onların "mükəmməl insanlar" olduğunu bildirib. Lakin onun şahzadə Harri və Meqan Markl haqqında eyni fikirdə olmadığı açıqdır.
Meqan, Tramp prezident seçilməzdən əvvəl onu "qadın düşməni" və "bölücü bir fiqur" adlandırmışdı.
Bu ilin fevral ayında Tramp, Harri haqqında qalmaqallı bir açıqlama verərək, onun ABŞ-dan deportasiya edilməyəcəyini, çünki “artıq həyat yoldaşı ilə kifayət qədər problemi olduğunu” söyləmişdi.