Bakı, AzerVoice

Danimarka hökuməti Ukraynaya humanitar yardım və yenidənqurma işlərinə dəstək məqsədilə 405 milyon kron (54 milyon avro) maliyyə yardımı ayıracağını bəyan edib.

AzerVoice xəbər verir ki, bu barədə Danimarka Xarici İşlər Nazirliyinin bəyanatında bildirilir.

BMT-nin hesablamalarına görə, 2025-ci ilə qədər Ukraynada təxminən 13 milyon insanın humanitar yardıma ehtiyacı olacaq.

Danimarkanın elan etdiyi yardım paketinin yarısı humanitar dəstəyə – qida, dərman, su və sığınacaq kimi əsas ehtiyacların təmin olunmasına, digər yarısı isə yenidənqurma işlərinə yönəldiləcək.

Qeyd edək ki, Danimarkanın 2022-ci ildən bəri Ukraynaya ayırdığı ümumi humanitar yardım bu ianə ilə birlikdə 1 milyard kronu (134 milyon avro) keçib. Hərbi dəstək isə təxminən 7,2 milyard avroya çatıb.

Ötən həftə xarici işlər naziri Rasmussen və baş nazir Mette Frederiksen Avropanın genişmiqyaslı yenidən silahlanmasının zəruriliyini vurğulayaraq, Rusiyadan gələn təhlükənin artdığını bildiriblər. Kopenhagen, həmçinin, növbəti iki il ərzində müdafiə xərclərini 50 milyard kron (6,7 milyard avro) artıracağını açıqlayıb.