BAKI, AzerVoice
Türkiyənin Ədliyyə naziri Yılmaz Tunç “Terrordan Azad Türkiyə” prosesi çərçivəsində PKK-nın silahı yerə qoyma qərarı ilə bağlı açıqlamalar verib.
AzerVoice xəbər verir ki, nazir bu günü Türkiyənin tarixi üçün dönüş nöqtəsi kimi dəyərləndirib.
“Biz həqiqətən tarixi bir gündəyik. 40 ildən artıqdır ki, ölkəmizin inkişafına mane olan terror bəlasının sonuna şahidlik edirik. Terrorsuz Türkiyə dövrünün ən mühüm mərhələlərindən biri bu gün baş verir. Bu proses millətimizin sülhü, təhlükəsizliyi və birliyi baxımından əlamətdar əhəmiyyət daşıyır.” - deyə Nazir Tunç bəyanatında bildirib.
Tunç qeyd edib ki, silahsızlanma qərarı sadəcə təhlükəsizlik deyil, həm də hüquqi sabitlik və sosial ədalət baxımından vacib addımdır. O, bu prosesi “millətin tarixində yeni səhifə” kimi dəyərləndirib.
Qeyd edək ki, bu gün Süleymaniyyədə PKK-nın ilk silah buraxma mərasimi keçirilib və prosesin mərhələli şəkildə davam etdirilməsi planlaşdırılır.