BAKI, AzerVoice

Ən böyük məqsədimiz Türkiyəni enerji sahəsində xarici asılılıqdan xilas etməkdir.

AzerVoice xəbər verir ki, Türkiyənin Enerji və Təbii Sərvətlər naziri Alparslan Bayraktar Avstriyanın paytaxtı Vyanada keçirilən 9-cu OPEC Beynəlxalq Seminarında çıxışı zamanı ölkəsinin enerji siyasətləri və regional strategiyaları ilə bağlı açıqlamalar verib.

Bayraktar bildirib ki, Türkiyənin gündəlik 2 milyon barrel neft və təbii qaz ehtiyacını daxili imkanlar və beynəlxalq əməkdaşlıqlar vasitəsilə qarşılamaq əsas hədəfdir: “Ən böyük məqsədimiz Türkiyəni bu sahədə xarici asılılıqdan xilas etməkdir”.

Nazir qeyd edib ki, Türkiyə son illərdə həm daxildə, həm də beynəlxalq miqyasda həyata keçirdiyi kəşfiyyat və hasilat fəaliyyətləri ilə enerji sektorunda önəmli mövqe qazanıb. Qara dənizdə qaz yataqları,Kabarda gündəlik 80 min barrel hasilat və Diyarbəkirdəki neft kəşfi bu istiqamətdə əsas mərhələlərdən hesab olunur.

Bayraktar əlavə edib ki, Türkiyə yalnız daxili istehsalla kifayətlənməyəcək, eyni zamanda Afrikada, Yaxın Şərqdə və digər regionlarda tərəfdaşlıqlar quraraq hasilata yönələcək. İraq, Azərbaycan və Bəsrə bölgəsindəki ortaq layihələr bu strategiyanın nümunəsidir.

OPEC platformasının əməkdaşlıq imkanlarına diqqət çəkən Bayraktar, Türkiyənin həm qazlaşdırma, həm də boru kəməri infrastrukturuna böyük sərmayə yatırdığını, bununla regional təchizat təhlükəsizliyinə də mühüm töhfə verdiyini vurğulayıb.

Nazir bildirib ki, Türkiyə mayeləşdirilmiş təbii qazın (LNG) Avropaya nəqlində vacib tranzit rolunu oynayır və ölkəyə daxil olan qazın istifadə olunmayan hissəsi artıq ixrac edilir.

O, Suriyada həyatın normallaşması və enerji təminatı məqsədilə təbii qazın çatdırılmasına dair layihələrin də tamamlanmaq üzrə olduğunu açıqlayıb.

Bayraktar həmçinin Türkiyənin elektrik enerjisi infrastrukturuna yönəlik 2035-ci ilə qədər 30 milyard dollarlıq sərmayə planladığını, ölkəni şimaldan cənuba və şərqdən qərbə elektrik magistralları ilə birləşdirmək niyyətində olduqlarını qeyd edib.