BAKI, AzerVoice

Türkiyədə İŞİD-ə qarşı keçirilən irimiqyaslı əməliyyatda 17 şəhərdə 89 nəfər saxlanılıb.

AzerVoice xəbər verir ki, Türkiyənin Daxili İşlər Naziri Ali Yerlikaya ölkə üzrə İŞİD terror təşkilatına qarşı həyata keçirilən əməliyyatlarla bağlı açıqlama verib.

Nazirin sözlərinə görə, Respublika Baş Prokurorluğu və Təhlükəsizlik Baş İdarəsinin Anti-Terror Şöbəsi ilə koordinasiyalı şəkildə 17 vilayətdə aparılan əməliyyatlarda İŞİD-lə əlaqəli olduqları müəyyən edilən 89 nəfər saxlanılıb.

Əməliyyatlar Antalya, Batman, Dənizli, Elazığ, Əskişəhər, Qaziantep, Hatay, İstanbul, Kahramanmaraş, Kırıkkale, Kilis, Malatya, Osmaniye, Sakarya, Şanlıurfa, Van və Yozgat vilayətlərində keçirilib.

Ali Yerlikaya əməliyyatda iştirak edən qubernatorları, baş prokurorları və təhlükəsizlik qüvvələrini təbrik edərək, “Terrora qarşı birlik və həmrəylik bizim ən böyük gücümüzdür. Xalqımızın sülh və təhlükəsizliyini qorumaq üçün əməliyyatlarımız fasiləsiz davam edəcək” - deyə bildirib.

Qeyd edək ki, Türkiyə son illərdə İŞİD və digər radikal terror qruplarına qarşı sərt və ardıcıl əməliyyatlar həyata keçirərək, təhlükəsizlik səviyyəsini gücləndirməkdə davam edir.