BAKI,VOA,Yusif Şərifzadə
Qəzzada İsrailin davam edən hərbi əməliyyatları nəticəsində ölən və yaralanan fələstinlilərin sayı artmaqda davam edir. Qəzzanın Səhiyyə Nazirliyi son 24 saat ərzində İsrail hücumları nəticəsində daha 8 fələstinlinin öldüyünü, 32 nəfərin isə yaralandığını açıqlayıb.
VOA xəbər verir ki, Qəzzanın Səhiyyə Nazirliyinin məlumatına görə, 2025-ci ilin oktyabrında elan edilmiş atəşkəsdən sonra İsrail hücumları nəticəsində ölənlərin ümumi sayı 1 min 108 nəfərə, yaralananların sayı isə 3 min 578 nəfərə yüksəlib.
Nazirlik bildirib ki, 2023-cü il oktyabrın 7-dən etibarən Qəzza zolağında ölən fələstinlilərin ümumi sayı 73 min 231 nəfərə çatıb. Eyni dövr ərzində 173 min 686 nəfərin yaralandığı qeyd olunub.
Qəzza Səhiyyə Nazirliyi bölgədəki xəstəxanaların artan insan tələfatı və yaralıların müalicəsi ilə bağlı ciddi çətinliklərlə üzləşdiyini bildirib. Tibbi infrastrukturun vəziyyəti, dərman və tibbi ləvazimat çatışmazlığı humanitar vəziyyəti daha da ağırlaşdıran amillər kimi göstərilir.
Beynəlxalq təşkilatlar Qəzza zolağında mülki əhalinin müdafiəsinin təmin edilməsinin və humanitar yardımın fasiləsiz çatdırılmasının vacibliyini vurğulayırlar.