BAKI,VOA,Yusif Şərifzadə

İsrail ordusunun nümayəndəsi Ella Vaviya bildirib ki, Livan İsrailin düşməni deyil və əsas problem İranın dəstəklədiyi Hizbullah təşkilatıdır.

VOA xəbər verir ki, Ella Vaviya sosial şəbəkədə yaydığı açıqlamada Hizbullahın Livanı dəfələrlə dağıntı və qarşıdurmalara sürüklədiyini iddia edib. Onun sözlərinə görə, bu vəziyyət Livan xalqını sabitlik, təhlükəsizlik və rifah imkanlarından məhrum edir.

İsrail ordusunun nümayəndəsi qeyd edib ki, əgər Hizbullah razılaşmaların şərtlərini pozmaqdan və düşmənçilik xarakterli fəaliyyətlərdən əl çəksə, həm İsrail, həm də Livan üçün sabitlik və sakitlik təmin oluna bilər.

Ella Vaviya əlavə edib ki, Livan üçün qarşıdurmalardan uzaq, inkişaf və rifaha əsaslanan fərqli gələcək mümkündür.

Bu açıqlamalar İsrail ilə Hizbullah arasında atəşkəsin qüvvəyə minməsindən bir neçə saat sonra səsləndirilib.

Bununla yanaşı, Livanın cənubunda həyata keçirilən İsrail hava zərbələri və pilotsuz uçuş aparatlarının hücumları nəticəsində azı 12 nəfərin həlak olduğu bildirilir.