BAKI,VOA,Yusif Şərifzadə

Bat Universitetinin müdafiə və təhlükəsizlik üzrə mütəxəssisi, keçmiş Britaniya ordusu zabiti Patrik Buri hesab edir ki, İsrailin Livana qarşı hücumlarının genişlənməsi İsrail və ABŞ arasında İran məsələsinə yanaşmada fərqlərin daha açıq görünməsinə səbəb olur.

VOA xəbər verir ki, Patrik Buri bu barədə açıqlamasında bildirib ki, münaqişənin başlanğıcında İsrail və ABŞ eyni mövqedən çıxış edirmiş kimi görünürdü. Lakin zaman keçdikcə tərəflərin siyasi maraqları fərqli istiqamətlərə yönəldiyindən bu uyğunluq zəifləyib.

Onun sözlərinə görə, İsrailin Baş naziri Benyamin Netanyahu ölkə daxilində müəyyən siyasi təzyiqlərlə üzləşsə də, Hizbullah və İranla bağlı sərt xəttin davam etdirilməsi üçün hələ də dəstəyə malikdir.

Buri qeyd edib ki, ABŞ Prezidenti Donald Tramp isə fərqli siyasi hesablamalar aparır. O bildirib ki, həm Vaşinqton, həm də Tehran ABŞ-İran razılaşmasının qüvvədə qalmasında maraqlıdır.

Mütəxəssisin fikrincə, mövcud vəziyyət elə bir mərhələyə çata bilər ki, razılaşmanın davam etməsi həm İranın, həm də ABŞ-nin maraqlarına uyğun olsun.

Lakin o əlavə edib ki, eyni vəziyyət İsrailin milli təhlükəsizlik maraqları ilə üst-üstə düşməyə bilər və bu da tərəflər arasında fikir ayrılıqlarını daha da dərinləşdirə bilər.