BAKI,VOA,Yusif Şərifzadə
İsrailin Livanın müxtəlif bölgələrinə endirdiyi zərbələr nəticəsində səhər saatlarından etibarən azı 12 nəfər həyatını itirib.
VOA xəbər verir ki, bu barədə Livanın Milli Xəbər Agentliyi məlumat yayıb. Bildirilir ki, ölənlər arasında mülki şəxslərlə yanaşı, bir Livan hərbçisi də var.
Məlumata görə, Livanın şərqində yerləşən Qərbi Beka bölgəsinin Sohmor qəsəbəsində bir nəfər həlak olub. Nəbatiyyə bölgəsinin Kəfr Rumman kəndində isə bir Livan əsgəri öldürülüb.
Sur bölgəsinin Bəriş kəndində eyni ailənin dörd üzvü – ata, ana və iki uşaq həyatını itirib. Nəbatiyyə bölgəsinin Ərəb Salim kəndinə iki istiqamətdən həyata keçirilən hücum nəticəsində isə üç nəfər ölüb.
Bundan başqa, Deyr əz-Zəhrani yaşayış məntəqəsində bir nəfər, Duveyr kəndində motosikletə pilotsuz uçuş aparatı ilə endirilən zərbə nəticəsində daha bir nəfər həlak olub.
Sur bölgəsinin Şəhur yaşayış məntəqəsində də bir nəfərin öldüyü bildirilir.