BAKI,VOA,Yusif Şərifzadə

İsrail ordusu Livanın cənubunda hərbi əməliyyatların genişlənə biləcəyi ilə bağlı növbəti xəbərdarlıq yayıb. Bu dəfə Zefta qəsəbəsinin sakinlərinə ərazini tərk etmək çağırışı edilib.

VOA xəbər verir ki, İsrail ordusu ərəb dilində yayımladığı açıqlamada Livanın Zefta qəsəbəsində yaşayan sakinləri dərhal evlərini tərk etməyə çağırıb.

Bəyanatda qeyd olunub ki, mülki əhali təhlükəsizlik məqsədilə Zəhrani çayının şimal istiqamətinə doğru hərəkət etməlidir. İsrail tərəfi bunun səbəbi kimi bölgədə Hizbullahla əlaqələndirilən hədəflərə qarşı yaxın vaxtlarda genişmiqyaslı hərbi əməliyyatların planlaşdırıldığını göstərib.

Ordunun açıqlamasında vurğulanıb ki, bölgədə “güclü əməliyyatlar” həyata keçiriləcək və buna görə də sakinlərin ərazidən uzaqlaşması tövsiyə olunur.

Xəbərdarlıq Livanın cənubunda hərbi qarşıdurmaların intensivləşdiyi bir dövrdə verilib. Son günlər İsrail və Hizbullah arasında qarşılıqlı hücumlar artıb, müxtəlif yaşayış məntəqələri və hərbi mövqelər hədəfə alınıb.

Qeyd edək ki, bundan əvvəl də İsrail ordusu Ansariya, əl-Xarayeib, Şabrika, Sarafand, Adloun və Baisariya yaşayış məntəqələrinin sakinlərinə oxşar evakuasiya xəbərdarlıqları göndərmişdi.

Müşahidəçilər hesab edirlər ki, bu xəbərdarlıqlar Livanın cənubunda hərbi əməliyyatların coğrafiyasının genişlənməsi ehtimalını artırır və bölgədə humanitar vəziyyətlə bağlı narahatlıqları gücləndirir.