BAKI,VOA,Yusif Şərifzadə

Livan və İsrailin hərbi nümayəndə heyətlərinin yaxın günlərdə ABŞ Müdafiə Nazirliyində təhlükəsizlik məsələlərinə dair mühüm görüş keçirəcəyi gözlənilir. Danışıqlar regionda davam edən gərginlik və sərhəd boyunca hərbi əməliyyatlar fonunda baş tutacaq.

VOA xəbər verir ki, Livan və İsrail hərbi nümayəndə heyətləri Vaşinqtonda, ABŞ Müdafiə Nazirliyinin qərargahı olan Pentaqonda təhlükəsizlik danışıqları aparacaq.

Məlumata görə, Livan nümayəndə heyətinə ordunun əməliyyatlar idarəsinin rəhbəri Corc Rizkallah başçılıq edir. Heyətin tərkibində ümumilikdə altı zabit yer alıb.

AFP agentliyinə danışan adı açıqlanmayan Livan hərbi mənbəsinin sözlərinə görə, Beyrut tərəfi görüş zamanı real və davamlı atəşkəsin təmin olunmasını, İsrailin Livan ərazisinə hücumlarının dayandırılmasını, həmçinin dövlətin ölkə üzrə təhlükəsizlik və silahlar üzərində tam nəzarətinin təmin edilməsinə yönəlmiş planını təqdim edəcək.

İsrail nümayəndə heyətinə isə ordunun planlaşdırma idarəsinin strateji bölməsinin rəhbəri, briqada generalı Amiçay Levin rəhbərlik edir.

Onilliklərdir rəsmi olaraq müharibə vəziyyətində olan Livan və İsrail arasında birbaşa danışıqlar bu ilin aprel ayında başlayıb. Tərəflər arasında növbəti danışıqlar raundunun iyunun əvvəlində keçirilməsi gözlənilir.

Bu arada Hizbullahın parlament bloku Livan hakimiyyətini İsraillə birbaşa danışıqlardan geri çəkilməyə çağırıb. Təşkilat İsraili təhlükəsizlik koordinasiyası vasitəsilə öz hərbi fəaliyyətlərini legitimləşdirməyə çalışmaqda ittiham edib.

ABŞ və İsrail uzun müddətdir Hizbullahın silahsızlaşdırılmasını tələb edir. Livan hökuməti ötən il bu vəzifənin icrasını orduya həvalə etsə də, prosesin mürəkkəbliyi səbəbindən məsələnin həlli hələ də açıq qalır.