BAKI,VOA Orxan Qədirzadə

Qətər əmiri Şeyx Təmim bin Həməd Al Sani ilə ABŞ Prezidenti Donald Tramp arasında telefon danışığı baş tutub. Danışıq zamanı Yaxın Şərqdə son vəziyyət, gərginliyin azaldılması və bölgədə sabitliyin qorunması məsələləri müzakirə olunub.

VOA xəbər verir ki, Qətər Əmirliyi Divanının yaydığı məlumata görə, tərəflər xüsusilə Pakistanın vasitəçiliyi ilə aparılan diplomatik təşəbbüsləri nəzərdən keçiriblər. Telefon danışığında regionun yeni qarşıdurmalardan qorunmasının və beynəlxalq sülh ilə təhlükəsizliyin təmin edilməsinin vacibliyi vurğulanıb.

Müzakirələr zamanı mövcud böhranın dialoq yolu ilə həllinin əhəmiyyəti ön plana çıxarılıb. Tərəflər strateji dəniz keçidlərinin təhlükəsizliyi, gəmiçilik azadlığının qorunması, eləcə də qlobal enerji və təchizat zəncirlərinin fasiləsiz fəaliyyətinin təmin olunması məsələlərini də dəyərləndiriblər.

Qətər əmiri Şeyx Təmim bin Həməd Al Sani telefon danışığı zamanı ölkəsinin mövqeyinin dəyişməz olaraq siyasi və diplomatik həll yollarını dəstəklədiyini bildirib. O qeyd edib ki, Doha böhranın dialoq vasitəsilə həllinə yönəlmiş bütün təşəbbüsləri dəstəkləyir və regionda sabitliyin möhkəmləndirilməsini vacib hesab edir.

Telefon danışığı İran ilə ABŞ arasında davam edən gərginlik, Hörmüz boğazı ətrafında artan narahatlıq və bölgədə mümkün hərbi eskalasiya ehtimallarının müzakirə olunduğu həssas bir dövrdə baş tutub.