BAKI,VOA, Fərid Mikayılov

Almaniya Hərbi Dəniz Qüvvələrinin mümkün əməliyyat hazırlıqları çərçivəsində Aralıq dənizinə mina təmizləyən gəmi göndərəcəyi açıqlanıb.

VOA xəbər verir ki, Almaniyanın müdafiə naziri Boris Pistorius yerli mediaya açıqlamasında bildirib ki, sözügedən gəmi ehtimal olunan Hörmüz boğazı əməliyyatına hazırlıq məqsədilə yerləşdiriləcək.

Nazirin sözlərinə görə, mina təmizləyən gəmi ilə yanaşı, komanda və təchizat gəmisi də bölgəyə göndəriləcək. Lakin gəmilərin konkret nə vaxt yola düşəcəyi açıqlanmayıb.

Bildirilib ki, mümkün əməliyyat üçün bir sıra şərtlərin yerinə yetirilməsi vacibdir. Bunlara ABŞ və İran arasında davamlı atəşkəsin təmin olunması, beynəlxalq hüquqa uyğun hüquqi çərçivənin formalaşdırılması və Almaniya parlamentinin aşağı palatası olan Bundestag tərəfindən mandatın verilməsi daxildir.

Nazir həmçinin vurğulayıb ki, Almaniya mina təmizləmə sahəsində NATO daxilində ən güclü ölkələrdən biri hesab olunur və bu istiqamətdə aparıcı rol oynayır.

Qeyd edək ki, ABŞ Prezidenti Donald Tramp son dövrlərdə NATO müttəfiqlərini İranla bağlı hərbi əməliyyatlarda iştirak etmədiklərinə görə tənqid edib.