BAKI,VOA, Nailə Babazadə

Livan Prezidenti Cozef Aun ölkəsinin sabah ABŞ-ın paytaxtı Vaşinqtonda İsrail ilə keçirəcəyi görüşün əsas hədəflərini açıqlayıb.

VOA xəbər verir ki, Prezident bildirib ki danışıqlar zamanı atəşkəs müddətinin uzadılması və İsrail ordusunun Livanın cənubundakı yaşayış məntəqələrində həyata keçirdiyi dağıntıların dərhal dayandırılması tələb olunacaq.

Livan Prezident Administrasiyasından verilən məlumata görə Cozef Aun mütəşəkkil qrupların nümayəndələri ilə görüşündə Livanın Vaşinqtondakı səfiri Nada Həmədə Muavvadın hazırlıq toplantısında ölkəni təmsil edəcəyini vurğulayıb. Səfir tərəfindən qaldırılacaq əsas məsələlər sırasına cənub rayonlarındakı kənd və qəsəbələrin dağıdılmasının qarşısını almaq üçün təcili tədbirlərin görülməsi daxildir.

Prezident Aun Livanın müzakirələrdəki mövqeyinin dəyişməz olduğunu və suverenliyi təmin etməyən heç bir güzəşt və ya təslimiyyətin qəbul edilməyəcəyini diqqətə çatdırıb. Keçmiş təcrübələrin müharibənin yalnız ölüm və məcburi köç gətirdiyini göstərdiyini deyən dövlət başçısı bu səbəbdən diplomatik həll yolunu Livan üçün ən təhlükəsiz istiqamət hesab etdiyini qeyd edib.

Livanın daxili siyasi qüvvələri ilə sıx təmasda olduğunu bildirən Aun milli birliyin və daxili barışın qorunmasının vacibliyini xatırladıb. O məcburi köçkünlərin vəziyyətinin yaxından izlənildiyini və təhlükəsizlik şəraitinə uyğun olaraq vətəndaşların öz evlərinə qayıtması üçün işlərin davam etdirildiyini vurğulayıb. Livan lideri hər kəsin eyni gəmidə olduğunu xatırladaraq ölkəni təhlükəsiz limana çatdırmağın ortaq məsuliyyət olduğunu ifadə edib.