BAKI,VOA, Fərid Mikayılov
Hizbullah İsrail ordusuna qarşı həyata keçirdiyi hücum nəticəsində 4 “Merkava” tankını məhv etdiyini iddia edib.
VOA xəbər verir ki, təşkilat İsrailin atəşkəsi pozduğunu bildirərək Livanın cənubunda hərbi konvoyu hədəfə aldığını açıqlayıb.
Taybe istiqamətindən Deyr Siryan bölgəsinə doğru irəliləyən 8 zirehli texnikadan ibarət konvoy əvvəlcədən yerləşdirilmiş partlayıcı ilə vurulub. Hücum iki dalğa şəklində həyata keçirilib.
Məlumata görə, İsrail tərəfi bu iddialarla bağlı hələlik rəsmi açıqlama verməyib.
Qeyd edək ki, İsrail ordusu martın 2-dən etibarən Livana qarşı genişmiqyaslı hava hücumları həyata keçirib və cənub bölgələrdə əməliyyatları genişləndirib. Livan hökuməti münaqişə nəticəsində 1 milyondan çox insanın məcburi köçkünə çevrildiyini açıqlayıb.
Məlumata əsasən, tərəflər arasında əldə olunmuş 10 günlük müvəqqəti atəşkəs aprelin 17-də qüvvəyə minib.