BAKI,VOA

Bu gün, bazar ertəsi, İsrail işğal qüvvələrinin ciddi mühafizəsi altında onlarla yəhudi Əl-Əqsa məscidinə daxil olaraq Qübbətüs-Səxra qarşısında “epik səcdə” adlanan dini ayini icra ediblər. Basqına radikal baxışları ilə tanınan israilli haham Eyal Tsinov rəhbərlik edib. O, Qübbətüs-Səxraya aparan pilləkənlərdə dua edərək müsəlmanların hisslərini təhqir edən addım atıb.

VOA xəbər verir ki,Qüds İslam Əmlak İdarəsinin açıqlamasına görə, gün ərzində səhər və axşam saatlarında ümumilikdə 215 radikal yəhudi Bab əl-Məğaribə qapısından keçərək məscidə daxil olub. “Epik səcdə” tam şəkildə yerə uzanmaqla icra olunur və yəhudi dini ənənələrində ən yüksək itaət forması sayılır.

Bununla yanaşı, məskunlaşanlar köhnə şəhərdə yerləşən Qattanin bazarında dəmir qapı quraşdıraraq tarixi məkanın bir hissəsini kəsiblər. Fələstin tərəfi bu addımı “tarixi abidəyə hücum və bölgənin yəhudiləşdirilməsi cəhdi” kimi qiymətləndirib. Polis isə qapının sökülməsi ilə bağlı yerli əhalinin müraciətini rədd edib, məsuliyyəti üzərindən ataraq məskunlaşanlara dolayı dəstək verdiyi barədə şübhələr yaradıb.

Digər tərəfdən, Vadi Hilve Məlumat Mərkəzi bildirib ki, İsrail bələdiyyəsi Qüdsdə iki evi sökməyə məcbur edib. Nəticədə 16 fələstinli, o cümlədən dörd ailə, bazar ertəsi gecəsi evsiz qalıb. Sökülən evlərdən biri 1975-ci ildən, digəri isə 2012-ci ildən mövcud idi.