BAKI,VOA, Orxan Qədirzadə

Qətər Əmirlik Divanının verdiyi məlumata görə, Qətər Əmiri Şeyx Təmim bin Həməd Al Tani Dohada Böyük Britaniyanın Baş naziri Kir Starmer ilə görüşüb. Tərəflər arasında keçirilən yüksək səviyyəli danışıqlarda əsas diqqət regional və beynəlxalq vəziyyətin gərginləşməsi, eləcə də təhlükəsizlik sahəsində əməkdaşlığa yönəlib.

VOA xəbər verir ki, görüş zamanı Baş nazir Kir Starmer Qətərin regional sabitliyin qorunmasında oynadığı rolu yüksək qiymətləndirib. Əmirlik Divanının məlumatında qeyd olunur ki, Starmer müzakirələr zamanı İranın Qətərə qarşı törətdiyi hərbi təcavüzləri bir daha qətiyyətlə pisləyib. Britaniya hökumətinin başçısı Londonun Qətərin suverenliyinə və təhlükəsizliyinə verdiyi dəstəyin sarsılmaz olduğunu vurğulayıb.

Xatırladaq ki, fevralın sonunda ABŞ və İsrailin İrana qarşı başlatdığı hərbi əməliyyatlardan sonra regional gərginlik pik həddə çatıb. Pakistanın vasitəçiliyi ilə elan edilmiş iki həftəlik atəşkəs fonunda keçirilən bu görüş, həm də gələcək sülh danışıqları öncəsi müttəfiqlər arasında koordinasiyanın gücləndirilməsi məqsədi daşıyır.