BAKI,VOA, Nailə Babazadə

İsrail ordusu Tehranın mərkəzində həyata keçirdiyi hava hücumu zamanı bir sinaqoqa zərər dəydiyini rəsmən etiraf edib.

VOA xəbər verir ki, ordudan mətbuata verilən açıqlamada, İsrail qırıcılarının Tehranda vurduğu sinaqoqda yaranan "mülki itkilərə" görə təəssüf hissi keçirildiyi bildirilib.

İsrail tərəfinin iddiasına görə, əməliyyatın əsas məqsədi İran Silahlı Qüvvələrinin müharibəni idarə edən bölməsi – "Xatəmül-Ənbiya" Mərkəzi Qərargahının yüksək rütbəli komandirlərindən birini zərərsizləşdirmək olub. Açıqlamada qeyd olunur ki, hücum rejimin hərbi rəhbərliyindəki mühüm şəxsi hədəf alsa da, yaxınlıqdakı sinaqoqa da ciddi ziyan dəyib. Ordu rəsmiləri hadisədən kədərləndiklərini vurğulayaraq, hədəfin dini ibadətgah olmadığını müdafiə ediblər.

İran mediası və sosial şəbəkələrdə paylaşılan görüntülərdə Tehranın mərkəzində yerləşən "Rafi Niya" sinaqoqunun hücum nəticəsində ağır zədələndiyi aydın görünür. Binanın fasadının dağıldığı və daxili hissəsinə böyük ziyan dəydiyi qeyd olunur. Bu hadisə həm beynəlxalq ictimaiyyətdə, həm də dini dairələrdə kəskin etirazlara səbəb olub.