BAKI,VOA, Nailə Babazadə
Qəzzadakı Fələstin Səhiyyə Nazirliyinin yaydığı son yazılı bəyanatda 2023-cü ilin oktyabr ayından bəri davam edən hərbi əməliyyatların ağır statistikası paylaşılıb.
VOA xəbər verir ki, yenilənmiş məlumatlara görə, bölgədə həyatını itirənlərin ümumi sayı 72 min 291-ə, yaralıların sayı isə 172 min 68-ə yüksəlib.
Nazirlik son 48 saat ərzində daha əvvəlki hücumlarda yaralanan 2 nəfərin vəfat etdiyini, 25 nəfərin isə yaralandığını bildirib. Diqqətçəkən məqamlardan biri odur ki, 10 oktyabr 2025-ci ildə Qəzzada atəşkəsin qüvvəyə minməsinə baxmayaraq, həmin tarixdən bu yana baş verən insidentlərdə 715 nəfər həyatını itirib, 1968 nəfər yaralanıb. Həmçinin bu müddət ərzində dağıntılar altından 756 nəfərin cənazəsi çıxarılıb.
Səhiyyə rəsmiləri Qəzza Zolağında minlərlə insanın hələ də dağıntılar altında qaldığını vurğulayırlar. Dağılmış binaların altından cənazələrin çıxarılması prosesindəki texniki və hərbi çətinliklərin davam etdiyi qeyd olunur.