BAKI,VOA, Nailə Babazadə

Əbu-Dabi Hökumətinin Media Ofisindən verilən rəsmi məlumata görə, ölkənin hava hücumundan müdafiə sistemləri paytaxta yönələn ballistik raketi uğurla zərərsizləşdirib.

VOA xəbər verir ki, lakin raketin vurulması zamanı yerə düşən qəlpələr Əbu-Dabi Xəlifə İqtisadi Bölgəsində (KEZAD) yanğınların çıxmasına və mülki şəxslərin yaralanmasına yol açıb.

Hadisə zamanı 5-i Hindistan, 1-i isə Pakistan vətəndaşı olmaqla cəmi 6 nəfər xəsarət alıb. Yaralıların vəziyyətinin yüngül və orta dərəcəli olduğu bildirilir. Hökumət rəsmiləri KEZAD yaxınlığında üç fərqli nöqtədə yanğın qeydə alındığını, lakin bütün yanğınların qısa müddətdə nəzarət altına alındığını və soyutma işlərinin davam etdiyini açıqlayıb.

BƏƏ Müdafiə Nazirliyi hücumun İran tərəfindən ballistik raketlər və pilotsuz uçuş aparatları (PUA) vasitəsilə həyata keçirildiyini təsdiqləyib. Nazirlik hava hücumundan müdafiə qüvvələrinin istənilən təhdidə qarşı yüksək hazırlıq vəziyyətində olduğunu və mülki infrastrukturu qorumaq üçün bütün tədbirlərin görüldüyünü vurğulayıb.