BAKI,VOA, Nailə Babazadə

İsrailin müdafiə naziri İsrail Katz ordu komandanlığı ilə keçirdiyi təhlükəsizlik qiymətləndirmə iclasında İrana qarşı 22 gündür davam edən hərbi əməliyyatları müzakirə edib. Nazir bildirib ki, gələn həftə ABŞ ilə birlikdə həyata keçirilən hücumların intensivliyi "əhəmiyyətli dərəcədə" artırılacaq.

VOA xəbər verir ki, Katz vurğulayıb ki, İranın hərbi komandanlıq heyəti və strateji nöqtələri hədəf alınmağa davam edəcək. O, İsrail və ABŞ-ın maraqlarına yönəlmiş hər hansı "təhlükəsizlik təhdidi" tamamilə aradan qaldırılana qədər bu hücumların davam edəcəyini qeyd edib.

Xatırladaq ki, İsrail və ABŞ, Tehran və Vaşinqton rəhbərlikləri arasında danışıqlar davam edərkən 28 fevralda İrana hərbi hücum başladıb.

İran da İsrail ilə yanaşı, ABŞ bazalarının yerləşdiyi Qətər, Birləşmiş Ərəb Əmirlikləri (BƏƏ) və Bəhreyn başda olmaqla bəzi bölgə ölkələrində müəyyən etdiyi hədəflərə hücumlarla cavab verib.

ABŞ-İsrail hücumlarında İran lideri Əli Xamenei ilə yanaşı, çox sayda yüksək rütbəli rəsmi ölüb.

İranlı rəsmilərə görə, ABŞ-İsrail hücumlarında ölənlərin sayı 1348-i, yaralıların sayı isə 17 mini keçib.