BAKI,VOA, Nailə Babazadə

Səudiyyə Ərəbistanı bu gün İsrailin Suriyanın cənubundakı hərbi obyektləri hədəf alan zərbələrini pisləyən bəyanat yayıb.

VOA xəbər verir ki, Krallığın Xarici İşlər Nazirliyi bu hücumları "açıq təcavüz" və 1974-cü il qoşunların ayrılması haqqında razılaşmanın pozulması adlandırıb.

Rəsmi Ər-Riyad beynəlxalq birliyi müdaxilə etməyə və İsrailin beynəlxalq hüquq normalarını pozmasına son qoymağa çağırıb. Bəyanatda həmçinin Səudiyyə Ərəbistanının Suriya Ərəb Respublikası ilə həmrəy olduğu, onun suverenliyini və ərazi bütövlüyünü qorumaq üçün atılan bütün addımları dəstəklədiyi vurğulanıb.

İsrail ordusu isə cümə günü Suriyanın cənubuna endirilən zərbələrin Süveydə vilayətindəki dürzi icmasına qarşı edilən hücumlara cavab olduğunu bildirib.

Misir, Küveyt, İordaniya, Qətər və Türkiyə də daxil olmaqla digər regional ölkələr də hücumları pisləyən bəyanatlar yayıblar. Misir Xarici İşlər Nazirliyi bu gərginliyin regional təhlükəsizliyə qarşı təhlükəli bir etinasızlıq olduğunu və Yaxın Şərqi daha böyük xaosa sürükləyə biləcəyini xəbərdar edib. Türkiyə isə İsrailin hücumlarını "təhlükəli eskalasiya" kimi qiymətləndirərək dünya ictimaiyyətini bu hücumları dayandırmağa səsləyib.