BAKI, VOA, Nailə Babazadə

Birləşmiş Ərəb Əmirlikləri (BƏƏ) Müdafiə Nazirliyi bu gün İran tərəfindən atılan 10 balistik raketin və 45 pilotsuz uçuş aparatının (PUA) ölkənin hava hücumundan müdafiə sistemləri tərəfindən məhv edildiyini açıqlayıb.

VOA xəbər verir ki, nazirliyin verdiyi məlumata görə, İranın başlatdığı hücumlar çərçivəsində indiyədək BƏƏ ordusu ümumilikdə 314 balistik raket, 15 qanadlı raket və 1672 PUA-nı zərərsizləşdirib.

Açıqlamada həmçinin bildirilir ki, bu hücumlar nəticəsində indiyədək 2 BƏƏ hərbçisi, eləcə də Pakistan, Nepal, Banqladeş və Fələstin vətəndaşı olan 6 mülki şəxs həyatını itirib. Bundan əlavə, 157 nəfərin müxtəlif dərəcəli bədən xəsarətləri aldığı qeyd olunub. Nazirlik ölkənin təhlükəsizliyini və suverenliyini qorumaq üçün hər cür təhdidə qarşı tam hazır vəziyyətdə olduğunu vurğulayıb.

Xatırladaq ki, ABŞ və İsrail 28 fevral tarixində Tehran və Vaşinqton arasında danışıqlar davam edərkən İrana qarşı hərbi əməliyyatlara başlayıb. İran da buna cavab olaraq İsrail ilə yanaşı ABŞ hərbi bazalarının yerləşdiyi Qətər, BƏƏ və Bəhreyn kimi ölkələrdəki hədəfləri atəşə tutub. ABŞ və İsrailin birbaşa İranı hədəf alan zərbələri nəticəsində İranın ali lideri Ayətullah Əli Xamenei də daxil olmaqla bir çox yüksək rütbəli rəsmi öldürülüb. İran tərəfinin məlumatına görə, ölkə daxilindəki hücumlarda ölənlərin sayı 1348-i keçib, yaralıların sayı isə 17 minə çatıb.