BAKI,VOA,Yusif Şərifzadə

Birləşmiş Ərəb Əmirliklərinin dövlət enerji şirkəti ADNOC bildirib ki, əməkdaşlarına və aktivlərinə qarşı həyata keçirilən hücumlar şirkətin fəaliyyətinə ciddi təsir göstərir.

VOA xəbər verir ki, şirkətin yaydığı bəyanatda münaqişənin başlanmasından bəri Hörmüz boğazından keçən 15 ADNOC gəmisinin raket və pilotsuz uçuş aparatları (PUA) ilə hücuma məruz qaldığı qeyd olunub.

Məlumata görə, yalnız bu həftə üç gəmiyə hücum edilib.

Şirkət bildirib ki, hücumlar nəticəsində bir ekipaj üzvü həlak olub, 20 nəfər isə yaralanıb.

İran və Oman arasında yerləşən Hörmüz boğazı dünya neft daşımalarının ən strateji marşrutlarından biri hesab olunur və qlobal neft istehlakının təxminən 20 faizi bu su yolu vasitəsilə daşınır.

ADNOC qeyd edib ki, ABŞ-İsrail və İran arasında münaqişənin regional miqyas alması ilə kommersiya gəmilərinə hücumlar artıb, bu isə həm daşınma xərclərinin yüksəlməsinə, həm də təhlükəsizlik risklərinin güclənməsinə səbəb olub.

Şirkət əlavə edib ki, aidiyyəti dövlət qurumları ilə sıx əməkdaşlıq edir, əməkdaşlarının, aktivlərinin və əməliyyatlarının qorunması üçün bütün zəruri tədbirləri görür, eyni zamanda müştərilərin tələbatını mümkün qədər qarşılamağa çalışır.