BAKI, VOA, Nailə Babazadə

İsrail ordusunun 2 mart tarixindən etibarən Livana qarşı başlatdığı hərbi əməliyyatlar genişlənərək paytaxt Beyrutun mərkəzi və sahil hissələrini hədəf almağa davam edir.

VOA xəbər verir ki, son məlumatlara görə, İsrail hərbi təyyarələri şəhərin Dahiye və Remle Beyda bölgələrinə intensiv hava zərbələri endirib. Şahidlərin bildirdiyinə görə, Beyrutun mərkəzində şiddətli patlayış və aşağı hündürlükdə uçan qırıcıların səsləri eşidilib, vurulan nöqtələrdən qara dumanlar yüksəlib. Xüsusilə gecə saatlarında Remle Beyda sahilində həyata keçirilən hücumda dəniz kənarındakı bir avtomobilin hədəf alındığı və zərbənin gücündən dəniz suyunun metrlərlə hündürlüyə qalxdığı görüntülənib.

Livan Səhiyyə Nazirliyi son hücumlar nəticəsində can itkilərinin artdığını bəyan edib. Sahil bölgəsinə endirilən zərbə nəticəsində həyatını itirənlərin sayı 8 nəfərə yüksəlib, 31 nəfər isə müxtəlif dərəcəli bədən xəsarətləri alıb. Ümumilikdə, martın 2-dən bəri davam edən eskalasiya nəticəsində Livanda ölənlərin sayı 634-ə, yaralıların sayı isə 1586-ya çatıb. İsrail ordusu bu hücumları Livan ərazisindən ölkənin şimalına atılan raketlərə cavab olaraq həyata keçirdiyini və bölgədəki hərbi infrastrukturun məhv edilməsinə yönəldiyini iddia edir.

Müharibənin gətirdiyi humanitar böhran hər keçən gün daha da dərinləşir. Livan hökumətinin rəsmi rəqəmlərinə görə, hücumların başladığı on gün ərzində 816 min 700 nəfər yaşayış yerini tərk edərək müvəqqəti sığınacaq mərkəzlərinə müraciət edib. İsrailin həm havadan, həm də dənizdən intensiv zərbələrlə yanaşı, quruda da işğal zonasını genişləndirmək qərarı mülki əhali arasında qorxu və köç dalğasını sürətləndirib. Beynəlxalq yardım təşkilatları sığınacaqlardakı həddindən artıq sıxlıq və əsas ehtiyacların qarşılanmasında yaranan çətinliklərlə bağlı xəbərdarlıq edirlər.