BAKI,VOA, Fərid Mikayılov

UNICEF bildirib ki, İsrail ilə Hizbullah arasında müharibənin şiddətlənməsi fonunda Livanda 2 mart tarixindən bu yana ən azı 83 uşaq həyatını itirib, 254 uşaq isə yaralanıb.

VOA xəbər verir ki, UNICEF-in bazar ertəsi təşkilatın rəsmi saytında yayımladığı açıqlamada qeyd olunub ki, ötən həftə ərzində Livan üzrə hər gün orta hesabla 10-dan çox uşaq həyatını itirib, təxminən 36 uşaq isə yaralanıb.

Açıqlamada həmçinin son 28 ay ərzində Livanda ümumilikdə 329 uşağın öldüyü, 1632 uşağın isə yaralandığı bildirilib.

Təşkilat bu rəqəmlərin sarsıdıcı olduğunu vurğulayaraq bildirib ki, məlumatlar münaqişənin uşaqlar üzərində yaratdığı ağır nəticələrin açıq sübutudur.

Bildirilib ki, Livan üzrə genişmiqyaslı məcburi köçürülmə təxminən 700 min insanı evlərini tərk etməyə məcbur edib. Onların təxminən 200 mini uşaqlardır.

UNICEF bütün tərəfləri məktəblər və sığınacaqlar da daxil olmaqla mülki şəxsləri və mülki infrastrukturu qorumağa, həmçinin beynəlxalq humanitar hüquq çərçivəsində öhdəliklərini yerinə yetirməyə çağırıb.

Açıqlamanın sonunda vəziyyətin gərginliyinin azaldılması və uşaqların daha çox zərər görməsinin qarşısının alınması üçün təcili addımların atılmasının vacibliyi vurğulanıb.