BAKI,VOA
Qətərin Baş naziri və xarici işlər naziri Şeyx Məhəmməd bin Əbdürrəhman Al Sani bildirib ki, İranın Qətər dövlətinə qarşı hücumu heç bir bəhanə və ya əsasla qəbul edilə bilməz.
VOA xəbər verir ki, Yaponiya xarici işlər naziri Toşimitsu Moteqi ilə telefon danışığı zamanı o qeyd edib ki, "İranın Qətər ərazilərinə hücumu ölkənin milli suverenliyinin kobud şəkildə pozulmasıdır, mehriban qonşuluq prinsipləri ilə bir araya sığmır və heç bir bəhanə ilə qəbul oluna bilməz".
O həmçinin vurğulayıb ki, Qətər dövləti hər zaman regional münaqişələrdən uzaq durmağa çalışıb və İran tərəfi ilə beynəlxalq ictimaiyyət arasında dialoqu asanlaşdırmağa səy göstərib. Lakin onun sözlərinə görə, ölkə ərazilərinin hədəfə alınması xoş niyyətdən xəbər vermir və iki ölkə arasındakı ikitərəfli münasibətlərin əsaslandığı anlaşma zəminini təhlükə altına qoyur.
Qətərin Baş naziri hər hansı eskalasiya xarakterli hərəkətlərin dərhal dayandırılmasının, dialoq masasına qayıtmağın, ağıl və hikmət dilinə üstünlük verməyin, habelə regionun təhlükəsizliyini qoruyacaq şəkildə böhranın qarşısını almaq üçün çalışmağın zəruriliyini vurğulayıb.
Qətər Xarici İşlər Naziri bildirib ki, Yaponiya xarici işlər naziri regiondakı hadisələrlə bağlı ölkəsinin narahatlığını ifadə edib. Nazir tərəfləri daha çox xaosun qarşısını almaq üçün məntiqli olmağa, danışıqlara və diplomatik vasitələrə qayıtmağa çağırıb.
O əlavə edib ki, telefon danışığı zamanı regionda hərbi gərginliyin artması, bunun regional və beynəlxalq təhlükəsizlik və sabitliyə ciddi fəsadları, eləcə də bütün mübahisələrin sülh yolu ilə həlli yolları nəzərdən keçirilib.
Öz növbəsində, Qətər Müdafiə Nazirliyi bəyan edib ki, Qətər dövləti bu gün, sübh saatlarında İran tərəfindən 10 pilotsuz uçuş aparatı (PUA) və 2 kruz raketinin hücumuna məruz qalıb.
Nazirlik 10 PUA və 2 raketin uğurla zərərsizləşdirildiyini bildirib.
Müdafiə Nazirliyi yaydığı bəyanatda vurğulayıb ki, Qətər Silahlı Qüvvələri dövlətin suverenliyini və ərazilərini qorumaq, istənilən xarici təhdidə qətiyyətlə cavab vermək üçün bütün imkan və potensiala malikdir.