BAKI, VOA, Nailə Babazadə

Livan Prezidenti Cozef Aun İsrailin ölkəsinin müxtəlif bölgələrinə təşkil etdiyi hücumların diplomatik səyləri və sabitliyi hədəf aldığını bildirib.

VOA xəbər verir ki, Livanın rəsmi NNA agentliyində Prezident Aunun İsrail hücumları ilə bağlı bəyanatı dərc olunub. Aun qeyd edib ki, İsrailin Livanın müxtəlif şəhərlərinə yönələn hücumları ölkəsinin qardaş və dost ölkələrlə, xüsusilə də Amerika Birləşmiş Ştatları ilə apardığı diplomatik təşəbbüsləri və sabitliyi bərpa etmək cəhdlərini boşa çıxarmağa yönəlmiş açıq düşmənçilik aktıdır.

Livan Prezidenti bu hücumların ölkəsinin suverenliyinin növbəti dəfə pozulması və beynəlxalq öhdəliklərin açıq şəkildə tapdalanması olduğunu vurğulayıb. O, həmçinin bu hərəkətlərin beynəlxalq birliyin iradəsinə zidd bir mövqe mənasına gəldiyini diqqətə çatdırıb. Prezident tərəflərin BMT Təhlükəsizlik Şurasının 1701 saylı qətnaməsinin bütün bəndlərinə tam şəkildə əməl etməli olduqlarını xatırladıb.

Aun bölgədə sabitliyi dəstəkləyən ölkələrə çağırış edərək, hücumların dərhal dayandırılması və beynəlxalq qərarların icrası üçün məsuliyyət daşımalı olduqlarını ifadə edib.

Xatırladaq ki, dünən İsrail hərbi təyyarələri Livanın şərqindəki Baalbek bölgəsinə bağlı Riyak kəndində bir binanı hədəf alıb. Hücum nəticəsində 10 nəfərin həyatını itirdiyi, 30 nəfərin yaralandığı açıqlanıb. Tamamilə dağılan binanın "Hizbullah"a yaxınlığı ilə bilinən bir maliyyə qurumunun yaxınlığında yerləşdiyi bildirilib. Həmin gün axşam saatlarında İsrail Livanın cənubundakı Sayda şəhəri yaxınlığında yerləşən eyn əl-Hilvə Fələstin qaçqın düşərgəsini də hədəf alıb; bu hücumda 2 nəfər ölüb, 3 nəfər yaralanıb.