BAKI,VOA, Fərid Mikayılov

ABŞ administrasiyası 14 ildən sonra Suriyada diplomatik fəaliyyətini bərpa etməyə hazırlaşır.

VOA xəbər verir ki, Donald Tramp administrasiyası Konqresə məlumat verərək, Dəməşqdə yerləşən ABŞ səfirliyinin yenidən açılması üçün planlaşdırma mərhələsinə keçməyə hazır olduğunu bildirib.

Fevralın 10-da göndərilən rəsmi bildirişdə planlaşdırma xərclərinin 15 gün ərzində başlanacağı göstərilsə də, səfirliyin nə vaxt tam fəaliyyətə başlayacağı və ABŞ diplomatlarının Dəməşqə daimi qayıdışının konkret vaxtı açıqlanmayıb.

ABŞ səfirliyi Suriyada 2012-ci ildə ölkədə vətəndaş müharibəsinin başlamasından sonra bağlanmışdı.

Administrasiya səfirliyin yenidən açılması məsələsini ötən ildən etibarən müzakirə edir. Bu müzakirələr uzun illər hakimiyyətdə olan Bəşşar Əsədin 2024-cü ilin dekabrında devrilməsindən sonra intensivləşib.

Məsələ ABŞ-ın Türkiyədəki səfiri və Suriyaya xüsusi nümayəndəsi Tom Barak üçün prioritet hesab olunur. Barak Suriyanın yeni rəhbərliyi, Əhməd əş-Şəraa administrasiyası ilə yaxınlaşmanı dəstəkləyir.

Barak ABŞ sanksiyalarının yumşaldılması və Suriyanın regional və beynəlxalq sistemə yenidən inteqrasiyası istiqamətində mühüm təşəbbüslərin müəllifi olub. O, ötən ilin may ayında Dəməşqə səfər edərək ABŞ bayrağını səfirlik binasında qaldırsa da, rəsmi açılış baş tutmamışdı.

Konqresə bildiriş göndərilən gün Barak Suriyanın İŞİD-ə qarşı beynəlxalq koalisiyada iştirakını müsbət qiymətləndirib. O, İŞİD-lə mübarizədə regional əməkdaşlığın əhəmiyyətini vurğulayıb.

Səfirliyin yenidən açılması ilə bağlı planlar məxfi xarakter daşıyır. Dövlət Departamenti yalnız Konqresə rəsmi bildiriş göndərildiyini təsdiqləyib, əlavə detalları açıqlamaqdan imtina edib.

Qeyd olunur ki, ABŞ oxşar mərhələli yanaşmanı Karakasdakı səfirliyinin yenidən açılmasında da tətbiq edib.