BAKI, AzerVoice, Nailə Babazadə

İsrail ordusunun Livan şəhərində Sur qəsəbəsində bir araca pilotsuz uçuş aparatı (PUA) ilə hücum etdiyi və nəticədə 1 nəfərin yaralandığı bildirilib.

AzerVoice xəbər verir ki, Sur şəhərinə bağlı Cenata qəsəbəsində gecə saatlarında baş verən hücum zamanı avtomobil hədəf alınıb və bir nəfər xəsarət alıb.

Qeyd edək ki, İsrail, 2023-cü ilin oktyabrında Livana qarşı hücumlara başlamış və bu hücumlar 2024-cü ilin sentyabrında genişmiqyaslı münaqişəyə çevrilmişdi. Münaqişədə 4 mindən çox insan həyatını itirmiş, təxminən 17 min nəfər yaralanmışdı.

Livan ilə İsrail arasında 27 noyabr 2024-cü ildə əldə edilən atəşkəs razılaşmasına baxmayaraq, İsrailin atəşkəsi dəfələrlə pozduğu bildirilir. İsrail 2023-cü ilin oktyabrından sonra ələ keçirdiyi bəzi yüksək ərazilərdə hələ də mövcudluğunu qoruyur və uzun illərdən bəri nəzarət etdiyi bəzi ərazilərdəki işğalını davam etdirir.

Livan Səhiyyə Nazirliyi açıqlayıb ki, atəşkəsin pozulması nəticəsində 27 noyabr 2024 – 20 noyabr 2025 tarixləri arasında İsrailin hücumlarında 331 nəfər həlak olub, 945 nəfər isə yaralanıb..