BAKI, AzerVoice, Orxan Qədirzadə
İsrailin müdafiə naziri İsrael Kats çərşənbə günü bildirib ki, ölkəsinin təhlükəsizliyi təmin olunmadan Livanda “sakitlik” mümkün olmayacaq. AzerVoice xəbər verir ki, bu açıqlama, İsrail ordusunun Hizbullahla ilyarımlıq atəşkəsə baxmayaraq əməliyyatlarını intensivləşdirdiyi bir vaxtda səsləndirilib.
Knessetdə çıxış edən nazir qeyd edib ki, İsrailin şimal bölgələri üçün təhlükə yaradan hər hansı fəaliyyətə imkan verilməyəcək:
“Şimal sakinlərinə yönələn təhlükələrə icazə verməyəcəyik. İcra tədbirləri maksimum səviyyədə davam edəcək və daha da güclənəcək,” – deyə Kats vurğulayıb.
O, bir neçə gün əvvəl Beyrutun cənubunda həyata keçirilmiş hava zərbəsi nəticəsində Hizbullahın yüksək rütbəli hərbi rəhbəri Heysəm Əli Tabətəbainin zərərsizləşdirilməsini bu siyasətin nümunəsi kimi göstərib. Bu, 2024-cü ilin noyabrında əldə olunan atəşkəsdən sonra İsrail tərəfindən öldürülən ən yüksək səviyyəli Hizbullah komandiri sayılır.
Kats əlavə edib ki, İsrailin təhlükəsizliyi tam təmin olunmayınca Livanda nə sabitlik, nə də nizam olacaq və Hizbullahın silahsızlaşdırılması əsas məqsədlərdən biri olaraq qalır.
Hadisələr bölgədə gərginliyin artdığı bir vaxtda baş verir. ABŞ Livan hökumətinə Hizbullahın tərksilah edilməsi ilə bağlı təzyiqləri gücləndirir. Bunun fonunda Misirin xarici işlər naziri Bədr Əbdül Atı çərşənbə günü Beyrutda Livan prezidenti Cozef Aunla görüşündən sonra bildirib ki, Qahirə eskalasiyanın qarşısını almaq üçün fəal diplomatik səylər göstərir.
“Biz istənilən eskalasiyadan ehtiyat edirik və Livanın təhlükəsizliyi, sabitliyi bizi narahat edir. Livanı hər hansı riskdən qorumaq üçün intensiv səylər göstəririk.” - nazir deyib.
Atəşkəs razılaşmasına əsasən, Hizbullah qüvvələri İsrail sərhədindən 30 kilometr şimal yerləşən Litani çayının o tayına çəkilməli, hərbi infrastruktur isə sökülməlidir. Livan ordusunun hökumət tərəfindən təsdiq olunmuş plana əsasən, ilin sonunadək çayın cənubunda qalan infrastrukturun ləğvi, daha sonra isə ölkənin digər ərazilərində tərksilah prosesinin həyata keçirilməsi nəzərdə tutulur.
Lakin ABŞ və İsrail Livan tərəfini prosesin ləngidilməsində ittiham edir. Hizbullah isə tərksilah planını qəti şəkildə rədd edir.