BAKI, VOA, Nailə Babazadə

İsrail ordusunun martın 2-dən etibarən Livana qarşı başlatdığı genişmiqyaslı hərbi əməliyyatlar bütün şiddəti ilə davam edir.

VOA xəbər verir ki, Livanın rəsmi NNA agentliyinin yaydığı məlumata görə, İsrail hərbi təyyarələri səhər saatlarından başlayaraq ölkənin cənubundakı Dıbbin, Kefer Sir, Haruf, Zibdin, Yatır və Burç Rahhal yaşayış məntəqələrini intensiv bombardman edib. Kefer Sir qəsəbəsində yerləşən iki mərtəbəli binanın hədəf alınması nəticəsində azı 3 mülki şəxs həyatını itirib. Eyni zamanda, sərhəd xəttində yerləşən Hiyam, Sadiykayn və Zıbkin bölgələri ağır artilleriya atəşinə tutulub.

İsrail quru qoşunları gecə saatlarında ölkənin cənubundakı Nakura, Bayyada və Dibil kəndlərinə daxil olaraq bir çox evi partlayıcılarla məhv edib, kənd təsərrüfatı torpaqlarında yanğınlar törədib və strateji yolları sıradan çıxarıb. İsrail komandanlığı bu addımları ölkənin şimalına atılan raketlərə cavab və quru işğalının genişləndirilməsi strategiyasının tərkib hissəsi kimi qiymətləndirir. Xatırladaq ki, martın 2-dən başlayan hücumlar zamanı həm havadan, həm də dənizdən Beyrut daxil olmaqla bütün Livan ərazisi intensiv atəş altında saxlanılır.

Livan Səhiyyə Nazirliyinin son hesabatına görə, münaqişənin başladığı bir ay ərzində həlak olanların sayı 1318-ə, yaralıların sayı isə 3935-ə çatıb. Livan hökuməti ölkə daxilində məcburi köçkün düşən insanların sayının artıq 1 milyon 162 mini keçdiyini açıqlayıb. Humanitar böhranın dərinləşdiyi bölgədə mülki infrastrukturun dağıdılması və yaşayış məntəqələrinin sistematik şəkildə sökülməsi beynəlxalq birliyin ciddi narahatlığına səbəb olub.