BAKI, AzerVoice, Nailə Babazadə
Fələstinin BMT-dəki Daimi Nümayəndəsi Riyad Mansur bildirib ki, atəşkəsdən sonra İsrail Qəzzada hər gün 2 uşağı öldürməyə davam edir.
AzerVoice xəbər verir ki, o, BMT Təhlükəsizlik Şurasında Fələstin məsələsi də daxil olmaqla Yaxın Şərqdəki vəziyyətlə bağlı keçirilən iclasda çıxış edərək bildirib.
“Qəzzada atəşkəsin qüvvəyə minməsindən (10 oktyabr) bəri hər gün 1000 insanın ölməsi və ya yaralanmasını, hər gün 2 uşağın həyatını itirməsini, soyqırımdan sağ çıxanların hər gün ölüm və əzabdan qaçmağa məhkum edilməsini, evlərindən didərgin salınan ailələrin su altında qalan çadırlarda qışı keçirməsini heç bir şəkildə əsaslandırmaq mümkün deyil.” - deyə o qeyd edib.
Mansur bildirib ki, İsrail fələstinlilərin “yaşamağa, azadlığa və sülhə” doğru irəliləyişini qəsdən əngəlləyir. Onun sözlərinə görə, ABŞ administrasiyası atəşkəsin pozulmasının qarşısını almaq üçün müdaxilə etməli, təminatçı ölkələr isə növbəti mərhələyə fokuslanmaq əvəzinə ardıcıl şəkildə yaranan böhrana diqqət yetirməlidirlər.
O əlavə edib ki, fələstinlilər İsrailin “məcburi köç, işğalı davam etdirmə və atəşkəsi pozma” niyyətini bilmələrinə baxmayaraq, ABŞ Prezidenti Donald Trampın sülh planını qəbul etmişdilər. Mansur qeyd edib ki, İsrail “yardım girişlərini gecikdirərək, hücumları bərpa edərək və Sarı Xətt vasitəsilə Qəzzada işğalı daha da dərinləşdirərək” atəşkəsi pozmaq məqsədini həyata keçirməyə çalışır.
Mansur, həmçinin İsrail əsgərləri və fələstinlilərin torpaqlarını mənimsəyən israillilərin İordan çayının Qərb Sahili və Qüdsdə həyata keçirdikləri hücumların, məcburi köçürmələrin və torpaqların müstəmləkələşdirilməsi siyasətinin dayandırılmalı olduğunu bildirib.
İsrail həbsxanalarındakı fələstinli məhbusların ağır vəziyyətindən danışan Mansur, müxtəlif növ işgəncələrə məruz qalan minlərlə fələstinli məhbusun durumuna BMT Təhlükəsizlik Şurasının biganəliyinin də izah olunmaz olduğunu söyləyib.
O, Sde Teiman həbsxanasında israilli nəzarətçilərin fələstinli bir məhbusu təcavüzə məruz qoyduğunu göstərən videonun sızdırılması zamanı İsraildə “skandalın təcavüz deyil, videonun sızdırılması” kimi təqdim edildiyini, hətta həmin nəzarətçiləri “qəhrəman” adlandıranların olduğunu vurğulayıb.
Mansur son iki ildə İsrail həbsxanalarında 100 fələstinlinin həyatını itirdiyini xatırladaraq əlavə edib: “Onlar ya birbaşa öldürüldülər, ya da aclıq və tibbi laqeydlik nəticəsində ölümə tərk edildilər.”