BAKI, AzerVoice

“HƏMAS” hərəkatı bazar günü ABŞ Dövlət Departamentinin bəyanatını qəti şəkildə rədd edib. Vaşinqton bəyanatında hərəkatın “İsraillə atəşkəs razılaşmasını yaxın günlərdə pozacağına dair etibarlı məlumatlar” olduğunu iddia etmişdi.

“HƏMAS”ın rəsmi açıqlamasında qeyd olunur ki, bu iddialar tam şəkildə İsrailin yalan və manipulyativ təbliğatı ilə üst-üstə düşür və “işğalçı qüvvələrin fələstin xalqına qarşı törətdiyi cinayətlərə və sistemli təcavüzə siyasi örtük yaratmaq məqsədi daşıyır.”

Bəyanatda vurğulanır ki, məhz İsrail hakimiyyəti regionda silahlı cinayətkar dəstələri təşkil edib, silahlandırıb və maliyyələşdirib. Bu qrupların fələstinli mülki şəxslərə qarşı qətl, oğurluq və humanitar yardım karvanlarına hücumlar həyata keçirdiyi bildirilib.

HƏMAS ABŞ administrasiyasını İsrailin yalan narrativini təkrarlamamağa və onun atəşkəs razılaşmasını pozan hərəkətlərinə, silahlı dəstələrə dəstək verməsinə və onlara sığınacaq təmin etməsinə son qoymağa çağırıb.

Hərəkat bəyan edib ki, Fələstin xalqına qarşı təcavüzlərə göz yuman və işğalçıya siyasi dəstək verən hər hansı bəyanat regionda sabitliyə deyil, gərginliyin dərinləşməsinə xidmət edir.