BAKI, AzerVoice, Nailə Babazadə
İsrailli rəsmilər Qəzza Zolağına tətbiq edilən qanunsuz blokadanı yarmaq və humanitar yardım çatdırmaq məqsədilə yola çıxan Əzm Flotiliyasına edilən hücumda saxlanılan aktivistlərin sayının 480 olduğunu açıqlayıb.
AzerVoice xəbər verir ki, İsrail Xarici İşlər Nazirliyi, Əzm Flotiliyasında saxlanılan aktivistlərlə bağlı suallara yazılı cavab verib.
Açıqlamada qeyd olunub ki, 1 oktyabr gecəsindən başlayaraq dünən səhərə qədər davam edən hücumlar zamanı Qlobal Sumud Donanmasında olan 474 aktivist saxlanılaraq İsrailə aparılıb.
Bu səhər həyata keçirilən son hücumda isə qanunsuz olaraq ələ keçirilən donanmanın son gəmisi “Marinette”də 6 aktivistin olduğu və onların da saxlanılaraq İsrailə aparıldığı bildirilib.
Əzm Flotiliyasının aktivistlərinin deportasiya prosesinə başlandığı, lakin bu prosesin müəyyən vaxt alacağı qeyd edilib.
Bundan əlavə, donanmadakı 4 aktivistin artıq deportasiya edildiyi, lakin onların kimliyi barədə məlumat verilmədiyi bildirilib.
Digər tərəfdən, İtaliya Xarici İşlər Nazirliyinin yaydığı yazılı açıqlamada, Əzm Flotiliyasına qatılan və İsrailə aparılaraq saxlanılan 4 italiyalı parlament üzvünün azad edildiyi bildirilib.
Qeyd edək ki, İsrailin blokadasını yarmaq və Qəzzaya humanitar yardım çatdırmaq məqsədilə yola çıxan Əzm Flotiliyası, 1 oktyabr axşamı Qəzza sularına yaxınlaşıb.
Flotilyaya hücum edən İsrail ordusu, onlarla qayığı və gəmini qanunsuz şəkildə ələ keçirərək yüzlərlə sərnişini saxlayıb.
Əzm Flotiliyası bu günə qədər Qəzzaya humanitar yardım aparmaq üçün birlikdə yola çıxan ən böyük donanma olaraq tarixə düşüb.