Bakı, AzerVoice, Nailə Babazadə

İsrailin Baş naziri Benyamin Netanyahu, Qətərin HƏMAS rəsmilərini ölkədən çıxarmadığı təqdirdə yenidən hücum edəcəkləri ilə hədələyib.

AzerVoice xəbər verir ki, İsrail Baş Nazirlik Ofisinin ABŞ mərkəzli X sosial media platformasındakı rəsmi hesabından yayımlanan video müraciətində qeyd olunur.

"Ya onları ölkədən çıxarırsınız, ya da ədalətə təhvil verirsiniz. Əgər bunu etməsəniz, biz edəcəyik." - deyə Netenyahu qeyd edib.

Netanyahu həm Qətərə, həm də HƏMAS nümayəndələrinin olduğu bütün ölkələrə səsləndiyini bildirib. O, HƏMAS-ın 2023-cü il 7 oktyabr tarixində həyata keçirdiyi gözlənilməz hücumu 11 Sentyabr terror hücumları ilə müqayisə edərək, Dohaya qarşı edilən hücumu haqlı çıxarmağa çalışıb.

Qətərin suverenliyini və beynəlxalq hüququn əsas prinsiplərini pozaraq həyata keçirilən hücuma görə İsrailin dünyanın müxtəlif yerlərindən qınaqlarla üzləşdiyinə toxunan Netanyahu əlavə edib ki, "İndi dünyanın bir çox ölkəsi İsraili qınayır. Onlar özlərindən utanmalıdırlar."

Qeyd edək ki, İsrail ordusu ötən gün Qətərin paytaxtı Dohada HƏMAS-ın danışıqlar heyətinin yerləşdiyi binaya hərbi təyyarələrlə hücum etmişdi.

HƏMAS hücumdan sonra bildirib ki, rəhbərlik heyəti İsrailin sui-qəsdindən sağ çıxıb, lakin HƏMAS Siyasi Bürosunun üzvü Xəlil Hayyənin oğlu, 4 HƏMAS üzvü və bir Qətər polisi hücum nəticəsində həlak olub.