BAKI, AzerVoice, Səməd Əyyubov
Suriyanın qonşu ölkələrində yaşayan təxminən 850 min qaçqın vətəninə geri dönüb.
AzerVoice xəbər verir ki, bu barədə BMT-nin Qaçqınlar üzrə Ali Komissarlığının (UNHCR) müavini Kelli Klements məlumat verib.
Onun sözlərinə görə, ötən ilin dekabrında Bəşşar Əsəd rejiminin devrilməsindən sonra suriyalıların geri dönüş prosesi sürətlənib. Klements əlavə edib ki, yaxın həftələrdə bu rəqəmin 1 milyona çatacağı gözlənilir.
BMT rəsmisi qayıdanların sayının çox yüksək olduğunu vurğulayaraq bildirib ki, müxtəlif səbəblər suriyalıların geri dönmə qərarında rol oynayır.
“Hazırda dinamik bir dövr yaşanır və bu, son 14 ildə şahidi olduğumuz ən böyük məcburi köçkünlük probleminə potensial həll yolları tapmaq üçün bir fürsət ola bilər” - deyə, Kelli Klements qeyd edib.
Xatırladaq ki, bundan əvvəl Türkiyənin daxili işlər naziri Ali Yerlikaya, ötən il dekabrın 8-dən bəri ölkələrinə könüllü və təhlükəsiz şəkildə geri dönən suriyalıların sayının 450 min 169 nəfər olduğunu açıqlamışdı.