BAKI, AzerVoice, Səməd Əyyubov

Hizbullahın sabah Beyrutun mərkəzində aksiya keçirmək barədə əvvəlki çağırışından geri çəkildiyi bir vaxtda, Livanın daxili işlər naziri Əhməd Həccar bütün tərəflərin maraqlarına uyğun olan yolun silahların dövlətə təhvil verilməsi olduğunu vurğulayıb.

AzerVoice xəbər verir ki, Həccar bu gün “Əl-Ərəbiyyə” telekanalına açıqlamasında bildirib ki, Livanda heç kim vətəndaş müharibəsi istəmir. O, hökumətin son qərarlarına qarşı keçirilə biləcək etiraz aksiyalarına da toxunaraq qeyd edib ki, təhlükəsizlik qüvvələri hər hansı zorakılığın qarşısını alacaq.

Xatırladaq ki, günün əvvəlində Hizbullah və “Amal” hərəkatı hökumətin silahların dövlətin nəzarətinə verilməsi ilə bağlı qərarına etiraz olaraq küçə aksiyasına çağırış etmişdi. Birgə bəyanatda onlar “müqavimət silahını vətəni müdafiə edən şərəfli silah” adlandıraraq, xarici təzyiqlərə boyun əyməməyə çağırmışdılar.

Lakin bir neçə saat sonra hər iki təşkilat aksiyanı təxirə saldıqlarını açıqlayaraq, bunun dialoq üçün fürsət yaratmaq məqsədi daşıdığını bildirdilər. Bu, Hizbullahın hökumətin silahların yalnız dövlətin əlində olması qərarına qarşı ilk dəfə rəsmi şəkildə küçə etirazına çağırışı idi. Bundan əvvəl isə tərəfdarları motosikletlərlə Beyrut küçələrində yürüşlər edərək bu qərara etirazlarını nümayiş etdirmişdilər.

Qeyd edək ki, Livan hökuməti avqustun əvvəlində silahların yalnız dövlətin əlində olması barədə qərar qəbul edib və orduya ayın sonunadək bununla bağlı plan hazırlamağı tapşırıb. Silahların təhvil verilməsi isə bu ilin sonuna qədər başa çatmalıdır. Baş nazir Nəvvaf Salam və prezident Cozef Aun bu qərarı misilsiz addım kimi qiymətləndiriblər.