BAKI, AzerVoice,Nailə Babazadə

İsrailin davam edən hücumları və tətbiq etdiyi blokada səbəbindən aclığın hökm sürdüyü Qəzza zolağında son 24 saat ərzində daha 11 fələstinlinin aclıqdan həyatını itirdiyi bildirilib.

AzerVoice xəbər verir ki,Qəzzadakı Fələstin Səhiyyə Nazirliyinin yaydığı yazılı bəyanatda İsrailin hücumları nəticəsində son 24 saatda 39 fələstinlinin həlak olduğu, 491 nəfərin isə yaralandığı qeyd olunub.

Nazirlik, 19 yanvarda əldə edilmiş atəşkəsi pozaraq 18 martdan bu yana həyata keçirilən hücumlar zamanı 9 min 862 fələstinlinin həyatını itirdiyini, 40 min 809 mülki şəxsin isə yaralandığını bildirib.

Bəyanatda həmçinin 27 maydan etibarən İsrail və ABŞ-ın təsiri altında fəaliyyət göstərən “Qəzza Humanitar Yardım Fondu”nun nəzarətində olan yardım paylama nöqtələrində baş verən sistemli hücumlar nəticəsində 1793 nəfərin öldüyü, 12 min 590 nəfərin isə yaralandığı qeyd olunub.

İsrailin 7 oktyabr 2023-cü ildən bu yana Qəzza zolağına həyata keçirdiyi hücumlar nəticəsində ümumilikdə 61 min 369 fələstinlinin həlak olduğu, 152 min 850 nəfərin isə yaralandığı bildirilib. Qeyd olunur ki, hələ də minlərlə cəsəd dağıntılar altında qalıb.