BAKI, AzerVoice
İsveçrə Xarici İşlər Nazirliyi bu gün, İran ilə İsrail arasında baş verən 12 günlük münaqişə səbəbilə Tehranda müvəqqəti olaraq bağlanan səfirliyinin yenidən açıldığını elan edib.
AzerVoice xəbər verir ki, bu barədə nazirliyin verdiyi bəyanatda deyilir.
Səfir Nadin Lozano və səfirliyin heyəti şənbə günü quru yolu ilə Tehrana qayıdıblar. Qeyd olunub ki, səfirlik öz fəaliyyətini mərhələli şəkildə bərpa edəcək.
Bəyanatda bildirilib ki, səfirliyin yenidən açılması qərarı “əhatəli risk analizindən və İran ilə ABŞ-la aparılan məsləhətləşmələrdən sonra” verilib. Xatırladaq ki, İsveçrə Tehranda ABŞ-ın maraqlarını təmsil edir.
Nazirlik əlavə edib ki, İsveçrə bölgədəki vəziyyəti yaxından izləyir və tərəfdaşları ilə sıx əlaqə saxlayır. Bəyanatda vurğulanır ki, bütün tərəflər təcili şəkildə diplomatik müstəviyə qayıtmalıdırlar.
Qeyd edək ki, 20 iyun tarixində İsveçrə səfirliyi İran və İsrail arasında gedən müharibə səbəbilə bağlanmışdı.
Xatırladaq ki, İsrail Hərbi Hava Qüvvələri iyunun 13-də İran ərazisinə hava zərbələri endiriblər. Zərbələr nəticəsində çoxlu sayda yüksək səviyyəli hərbçi, o cümlədən İran Silahlı Qüvvələri Baş Qərargah rəisi Məhəmməd Baqeri, İran İslam İnqilabı Keşikçilər Korpusu (SEPAH) baş komandanı Hüseyn Salami, Xatəm Əl-Ənbiya Qərargahının komandanı Qulaməli Rəşid, 6 nüvə alimi və yüksək vəzifəli şəxslər ölüb. İran BMT Təhlükəsizlik Şurasının hadisə ilə əlaqədar fövqəladə iclas keçirməsini istəyib.
Bu hücumlara cavab olaraq isə İran Ordusu İsrailə qarşı "Doğru vəd III" adlı əməliyyat keçirib. Təl-Əviv, Qüds və digər bölgələrə yüzlərlə ballistik raket buraxılıb.
ABŞ isə münaqişənin gərginləşməsindən doqquz gün sonra – 22 iyun gecəsi İrandakı üç nüvə obyektinə hücum etməklə münaqişəyə qoşulub. 23 iyun axşamı İran ABŞ-ın Qətərdə yerləşən və Yaxın Şərqin ən böyük Amerika bazası olan Əl-Udeyd bazasına raket zərbəsi endirib. ABŞ hakimiyyət orqanlarının verdiyi məlumata görə, hücum nəticəsində itki və ya ciddi dağıntı qeydə alınmayıb.
İyunun 24-də ABŞ prezidenti Donald Tramp İsrail və İranın tam atəşkəsin qüvvəyə mindiyini bəyan edib. İsrail tərəfi də ABŞ-ın atəşkəs təklifini qəbul etdiyini və qarşıya qoyulan bütün məqsədlərə nail olunduğunu bildirib.