BAKI, AzerVoice
İranın xarici işlər naziri Seyid Abbas Araqçi, Atom Enerjisi üzrə Beynəlxalq Agentliyin (AEBA) baş direktoru Rafael Qrossinin son bəyanatlarına sərt reaksiya verib.
AzerVoice İran KİV-ə istinadən xəbər verir ki, o, İran parlamentinin AEBA ilə əməkdaşlığın dayandırılması barədə qərar verdiyini bildirib. Araqçi bu qərarın, İranın nüvə fəaliyyətlərinin təhlükəsizliyi və müdafiəsi təmin edilənədək qüvvədə qalacağını vurğulayıb.
Araqçi bildirib ki, bu qərar, Qrossinin AEBA-nın keçmişdə bütün məsələləri rəsmi şəkildə bağlamasına baxmayaraq, bu reallığı qəsdən gizlətməsinin nəticəsidir.
"Qrossinin bu "qərəzli" mövqeyi, AEBA İdarə Heyətində İrana qarşı siyasi motivli qətnamənin qəbuluna zəmin yaradıb və nəticə etibarilə İsrail və ABŞ-ın İranın nüvə obyektlərinə qanunsuz hücumlarını asanlaşdırıb" - deyə, Araqçi vurğulayıb.
Nazir həmçinin əlavə edib ki, Qrossi, təşkilatın əsasnaməsinə və nəzarət mexanizmlərinə zidd şəkildə, bu hücumları açıq şəkildə pisləməkdən imtina edib. Araqçi Qrossinin bu davranışlarını peşə etikasına zidd və təəccüblü adlandırıb.
Xatırladaq ki, İsrail Hərbi Hava Qüvvələri iyunun 13-də İran ərazisinə hava zərbələri endiriblər. Zərbələr nəticəsində çoxlu sayda yüksək səviyyəli hərbçi, o cümlədən İran Silahlı Qüvvələri Baş Qərargah rəisi Məhəmməd Baqeri, İran İslam İnqilabı Keşikçilər Korpusu (SEPAH) baş komandanı Hüseyn Salami, Xatəm Əl-Ənbiya Qərargahının komandanı Qulaməli Rəşid, 6 nüvə alimi və yüksək vəzifəli şəxslər ölüb. İran BMT Təhlükəsizlik Şurasının hadisə ilə əlaqədar fövqəladə iclas keçirməsini istəyib.
Bu hücumlara cavab olaraq isə İran Ordusu İsrailə qarşı "Doğru vəd III" adlı əməliyyat keçirib. Təl-Əviv, Qüds və digər bölgələrə yüzlərlə ballistik raket buraxılıb.
ABŞ isə münaqişənin gərginləşməsindən doqquz gün sonra – 22 iyun gecəsi İrandakı üç nüvə obyektinə hücum etməklə münaqişəyə qoşulub. 23 iyun axşamı İran ABŞ-ın Qətərdə yerləşən və Yaxın Şərqin ən böyük Amerika bazası olan Əl-Udeyd bazasına raket zərbəsi endirib. ABŞ hakimiyyət orqanlarının verdiyi məlumata görə, hücum nəticəsində itki və ya ciddi dağıntı qeydə alınmayıb.
İyunun 24-də ABŞ prezidenti Donald Tramp İsrail və İranın tam atəşkəsin qüvvəyə mindiyini bəyan edib. İsrail tərəfi də ABŞ-ın atəşkəs təklifini qəbul etdiyini və qarşıya qoyulan bütün məqsədlərə nail olunduğunu bildirib.