BAKI, AzerVoice

İsrail, Qəzza zolağına çatdırılan humanitar yardımın HƏMAS-ın əlinə keçməsini istəmir, lakin ABŞ-ın yardımların özəl fond vasitəsilə Qəzzaya çatdırılmasını nəzərdə tutan planını dəstəkləyir.

AzerVoice xəbər verir ki, bu barədə İsrailin xarici işlər naziri Gideon Saar, Qüdsdə Almaniyanın xarici işlər naziri Yoxann Vadeful ilə keçirdiyi görüşdən sonra verdiyi açıqlamada bildirib.

“Hərbi əməliyyatlar zamanı İsrail Qəzza zolağına humanitar yardımın daxil olmasına icazə verdi. Lakin HƏMAS bu yardımları dinc əhalidən oğurladı. O, bu yardımı hakimiyyətini qorumaq üçün istifadə etdi – dinc sakinlərin hesabına. Əgər humanitar yardım HƏMAS-ın əlinə keçməyə davam edərsə, müharibə heç vaxt bitməyəcək” - deyə, Saar bildirib.

“Humanitar yardım ABŞ hökumətinin təqdim etdiyi prinsiplərə uyğun olaraq, özəl bir fond vasitəsilə idarə olunacaq. Bu proqram yardımı birbaşa mülki əhaliyə çatdırmağa imkan verəcək. HƏMAS-ın yenidən bu yardımlar üzərində nəzarəti ələ keçirməsinə yol vermək olmaz. İsrail Müdafiə Qüvvələrinin əsgərləri bu yardımları paylamayacaq, lakin onların bölgüsünün aparıldığı əraziləri qoruyacaq” - deyə, o əlavə edib.